Հուլիսին Վրաստանում անցկացվելու է ՆԱՏՕ-ի Noble Partner-2017 զորավարժությունը, որին մասնակցելու է նաև Հայաստանը: Այս մասին հայտնում է Վրաստանի ՊՆ կայքը:
ԱՄՆ զինուժի M777 հաուբիցը Վրաստանում անցկացվող զորավարժության ժամանակ
Հայաստանից բացի, զորավարժությանը մասնակցում են նաև ԱՄՆ, Մեծ Բրիտանիայի, Գերմանիայի, Թուրքիայի, Իսպանիայի, Ռումինիայի, Սլովենիայի, Ուկրաինայի, ինչպես նաև Ադրբեջանի ներկայացուցիչներ:
Զորավարժության նախապատրաստման համար Վրաստանի ԶՈւ արևելյան հրամանատարության 4-րդ մեխանիզացված բրիգադում քննարկվել են լոգիստիկ և տեխնիկական ապահովման հարցեր:
Noble Partner զորավարժությունն առաջին անգամ Վրաստանում անցկացվել է 2015 թվականին: 2016 թ. անցկացված զորավարժությանը մասնակցել են ԱՄՆ ԶՈւ 650 զինծառայող, բրիտանական ԶՈւ 150 զինծառայող, ինչպես նաև Վրաստանի ԶՈւ 500 զինծառայող:
Զորավարժությանը մասնակցել է 3 միավոր С-130 և 1 միավոր С-17 բեռնատար ինքնաթիռներ, որոնցից էլ դեսանտավորվել է զորավարժությանը մասնակցող զինծառայողների և տեխնիկայի մի մասը:
Զորավարժության համատեքստում բավական աղմուկ էին առաջացրել ամերիկյան М1А2 «Աբրամս» տանկերը և «Բրեդլի» հետևակի մարտական մեքենաները, որոնք Վրաստան էին բերվել հենց զորավարժությանը մասնակցելու համար: