Մարտի 16-ին թուրքական ոստիկանությունը ձերբակալել է ՆԳՆ առափնյա անվտանգության ուժերի սևծովյան շրջանի նախկին հրամանատարին, ինչպես նաև նույն շրջանի ավիացիայի հրամանատարին: Այս մասին հայտնում է թուրքական «Դողան» գործակալության կայքը:
Թուրքիայի առափնյա անվտանգության ուժերի հրամկազմից գնդապետ Մուրադ Օզերին թոշակի էին ուղարկել դեռևս 2016 թ. հուլիսի 15-ի ռազմական հեղաշրջման փորձից հետո: Այժմ նրան, ինչպես նաև ևս 15 այլլ սպաների և ենթասպաների ձերբակալել և մեղադրում են հեղաշրջման փորձին ներգրավվելու, «գյուլենական ահաբեկչական կառույցին անդամակցելու» համար:
Նշենք, որ հեղաշրջման փորձից հետո ձերբակալվել էր նաև առափնյա անվտանգության ուժերի հրամանատարը: Իսկ կառույցը ժանդարմերիայի հրամանատարության հետ հանվել են ԶՈւ ԳՇ ենթակայությունից և դրվել ներքին գործերի նախարարության ենթակայության տակ:
Ավելացնենք, որ 2016 թ. դեկտեմբերի 10-ին Թուրքիայի պաշտպանության նախարար Ֆիքրի Ըշըքը հայտարարել էր, որ ռազմական հեղաշրջման փորձից հետո մինչև այժմ երկրի զինված ուժերի հեռացվել է շուրջ 22,085 մարդ, որից 16,409-ը ռազմական դպրոցների կուրսանտներն են: