Լիբիայի արևմտյան մասի խորհրդարանի ղեկավար Աքիլյա Սալեհ Իսան «ՌԻԱ Նովոստի» գործակալության հետ զրուցում հայտնել է, որ իրենք Ռուսաստանից օգնություն են խնդրել զինծառայողների ուսուցման և զինտեխնիկայի վերանորոգման հարցում: Ռուսաստանը խոստացել է համագործակցել հակաահաբեկչական պայքարում:
Մինչ այս Reuters գործակալությունը, եգիպտական և ամերիկյան դիվանագիտական աղբյուրներին հղում անելով, հայտնել էր, որ Սիրիայի հետ սահմանից 100 կմ հեռու գտնվող Եգիպտոսի ԶՈւ Սիդի Բարանի ռազմաբազայում տեղակայվել են ՌԴ ԶՈւ անօդաչու թռչող սարքեր և 22 զինծառայող:
Գործակալությանը չէր հաջողվել պարզվել, թե ինչ առաքելությամբ են զինծառայողները եգիպտական ավիաբազայում: Ենթադրվում է, որ ՌԴ-ի այս քայլը ուղղված է Լիբիայի բանակի հրամանատար Հալիֆ Հաֆթարի ուժերին աջակցություն ցույց տալուն:
Սակայն ավելի ուշ Եգիպտոսի զինված ուժերի մամուլի խոսնակ Թամել ալ-Ռիֆային կտրականապես հերքել էր ՌԴ ԶՈւ զինծառայողների ջոկատի տեղակայումը երկրի արևմուտքում՝ Լիբիայի հետ սահմանին մոտ գտնվող ռազմաբազայում:
ՌԴ նախագահի մամուլի քարտուղար Դմիտրի Պեսկովն իր հերթին հայտնել էր, որ Ռուսաստանը ավելորդ է համարում իր միջամտությունը Լիբիայի հարցերում, սակայն դա չի նշանակում, որ ՌԴ-ն չի շփվում այն կողմի հետ, որի հետ անհրաժեշտ է համարում:
Մինչ այս՝ 2016-ի հոկտեմբերին, Եգիպտոսում Ռուսաստանի և Եգիպտոսի զինծառայողները անցկացրել էին «Բարեկամության պաշտպաններ-2016» զորավարժությունը: Բացի այդ, իր աղբյուրներին հղում անելով ՝ ռուսաստանյան «Известия» լրատվակայքը հայտնում էր, որ Ռուսաստանը բանակցություններ է վարում Եգիպտոսի հետ` այնտեղ ռազմական օբյեկտներ վարձակալելու շուրջ:
Խոսքը մասնավորապես եգիպտական նույն Սիդի-Բարրանի քաղաքում տեղակայված խորհրդային բազան վերականգնելու մասին է: Կողմերի փոխհամաձայնության գալու դեպքում` ռազմաբազան կսկի գործել 2019 թվականից:
Ներկայում Լիբիայում միմյանց դեմ կռվող կողմերը պայքար են մղում երկրի նավթաշատ վայրերի վերահսկողության համար:
Հիշեցնենք, որ շուրջ 4 տարի առաջ՝ 2011-ին Լիբիայում սկսվել է քաղաքացիական պատերազմ, գահընկեց է արվել երկրի ղեկավար Մուամմար Քադաֆին, ով ղեկավարում էր ավելի քան 40 տարի։ Լիբիայում քաղաքական ճգնաժամը շարունակվում է մինչ օրս: Այս պահին երկրում գործում է երկու կառավարություն: Երկրի արևմուտքում Տոբրուք քաղաք-կենտրոնով գործող ուժը Աքիլյա Սալեհ Իսայի գլխավորությամբ ընտրվել է 2014-ին և հենվում է երկրի կառավարական բանակի վրա: Իսկ արևելքում՝ Տրիպոլի քաղաք-կենտրոնով ՄԱԿ-ի և Եվրոպայի աջակցությամբ իշխում է 2015 թվականից՝ Ֆաես ալ-Սարաջեմի ղեկավարությամբ: Բացի այս, երկրում գործում են նաև այլ ընդդիմադիր ուժեր: