Տաջիկստանում տեղակայված 201-րդ ռուսաստանյան ռազմաբազայի օդաչուները զորավարժության ժամանակ Մի-8 և Մի-24 ուղղաթիռներով ոչնչացրել են պայմանական ահաբեկիչների տեխնիկան, զինապահեստը և ճամբարը։ Այս մասին մարտի 15-ին տեղեկացնում է ռուսաստանյան «ՌԻԱ նովոստի» լրատվական գործակալությունը։
Վարժանքներին ուղղաթիռների անձնակազմերը պայմանական հակառակորդի ցամքային թիրախների ուղղությամբ արձակել են չկառավարվող ավիացիոն հրթիռներ և ռմբակոծել են նրանց օբյեկտները։
Վարժանքների ընթացքում արձակվել է շուրջ 50 հրթիռ, 10-ից ավելի ավիառումբ։
Նշենք, որ Տաջիկստանը հարավում անմիջապես սահմանակից է Աֆղանստանին, ինչը մտահոգություն է առաջացնում, որ հարավից՝ Աֆղանստանից, այդ երկիր կարող են ներխուժել ինչպես «Թալիբանի», այնպես էլ՝ «Իսլամական պետության» զինյալները: Այս պատճառով Տաջիկստանում հակաահաբեկչական զորավարժություններն անցկացվում են պարբերաբար:
Տաջիկստանում ՌԴ ԶՈւ 201-րդ ռազմաբազան ստեղծվել է Ռուսաստանի և Տաջիկստանի միջև 2004-ին կնքված համաձայանգրով՝ 201-րդ մոտոհրաձգային դիվիզիայի հիմքի վրա։ 2012-ի բանակցություններից հետո երկու պետությունները ստորագրել են համաձայնագիր, որով ՌԴ ռազմաբազան Տաջիկստանում կշարունակի մնալ մինչև 2042 թվականը։ Ռազմաբազայում ծառայում է ՌԴ զինված ուժերի շուրջ 7,5 հազար զինծառայող։