Մարտի 15-ին ռուսաստանյան կողմը հայտնել է, որ ավելի վաղ ՌԴ հատուկ ծառայությունները կանխել են մարտի 8-ին Մոսկվայում նախատեսված ահաբեկչական գործողություն: Թուրքիայից եկած ահաբեկիչը նախատեսում էր ինքն իրեն պայթեցնել՝ Մոսկվայում մարտի 8-ի տոնակատարության ընթացքում: Այս մասին հայտնում է «Իզվեստիա» լրատվակայքը:
«Իսլամական պետություն» ահաբեկչական խմբավորման զինյալներ
Տաջիկստանի 23-ամյա քաղաքացի Իզատիլլո Մ.-ին Մոսկվայի օդանավակայաններից մեկում ձերբակալել են Ստամբուլի չվերթի իջնելուց անմիջապես հետո: Նրա կողմնակիցներին չի հաջողվել գտնել, քանի որ ահաբեկիչը չէր ճանաչում այն մարդկանց, ովքեր իրեն պետք է դիմավորեին:
Նախաքննության արդյունքում պարզվել է, որ Իզատիլլոն ներգրավված է եղել Սիրիայում ընթացող ռազմական գործողություններին: Համապատասխան միջոցառումների անցկացումից հետո ռուսաստանյան կողմը ձերբակալվածին փխանցել է Տաջիկստանի իրավապահներին, որտեղ նման հանցագործության համար Իզատելլոյին սպառնում է ցմահ ազատազրկում:
ՌԴ ՆԳՆ արագ արձագանքման հատուկ ստորաբաժանման (СОБР) աշխատակիցները
Ռուսաստանյան կողմը նշում է, որ ներկայում Ռուսաստանի տարածքում, այդ թվում՝ հենց Մոսկվայում, գործում են տարբեր ահաբեկչական խմբավորումներին կից համայնքներ (ջեմաաթ), որոնք կազմավորում են այսպես կոչված «քնած բջիջներ»: Սա այն դեպքն է, երբ մինչև հստակ հրահանգ ստանալը տվյալ համայնքի անդամները որևէ արտառոց, տարօրինակ արարքով, քայլով աչքի չեն ընկնում և սպասում են հարմար առիթի:
Ավելացնենք, որ ինչպես մարտի 14-ին հայտնել էր Ռուսաստանի անվտանգության խորհրդի քարտուղար Նիկոլայ Պատրուշևը՝ Ռուսաստանի հարավային դաշնային շրջանում աճում է ահաբեկչական սպառնալիքը, որը մասնավորապես պայմանավորված է Մերձավոր Արևելքում ահաբեկչական խմբավորումների համար կռվողների ներգաղթով: