Մարտի 1-ին ԵԱՀԿ առաքելությունը Արցախի շփման գծի պլանային դիտարկում է անցկացրել Ասկերանի շրջանի ուղղությամբ՝ Շխլյար բնակավայրի մոտակայքում։ Դիտարկումն անցել է ըստ նախատեսված ժամանակացույցի, կրակոցներ չեն արձանագրվել: Սակայն ադրբեջանական կողմը ԵԱՀԿ առաքելությանը դուրս չի բերել իր առաջապահ դիրքեր:
Այս մասին հայտնում է Artsakhpress լրատվական գործակալությունը` հղում անելով Արցախի ԱԳՆ մամուլի ծառայությանը:
Պաշտպանության բանակի դիրքերից դիտարկումն իրականացրել են ԵԱՀԿ գործող նախագահի անձնական ներկայացուցիչ (ԳՆԱՆ) դեսպան Անջեյ Կասպրշիկը և նրա դաշտային օգնականներ Գենադիե Պետրիկան (Մոլդովա) և Խրիստո Խրիստովը (Բուլղարիա):
Ադրբեջանական կողմից դիտարկումն իրականացրել են ԵԱՀԿ գործող նախագահի դաշտային օգնական Իրժի Աբերլեն (Չեղիա), ԵԱՀԿ ԳՆԱՆ գրասենյակի աշխատակից Պետեր Սվեդբերգը (Շվեդիա) և ԵԱՀԿ ԳՆԱՆ անձնական օգնական Սայմոն Թիլլերը (Մեծ Բրիտանիա)։
Դիտարկման առաքելությանը արցախյան կողմից ուղեկցել են Արցախի ԱԳՆ և ՊԲ ներկայացուցիչները:
Նշենք, որ փետրվարի 28-ին Արցախի ԱԳ նախարար Կարեն Միրզոյանն ընդունել է դեսպան Անջեյ Կասպրշիկին: Կողմերը քննարկել են Արցախի շփման գծում տիրող իրավիճակին և ԵԱՀԿ գործող նախագահի անձնական ներկայացուցչի գրասենյակի կողմից իրականացվող դիտարկումներին վերաբերող մի շարք հարցեր։
Կողմերն անդրադարձել են նաև փետրվարի 24-ի լույս 25-ի գիշերը Ադրբեջանի զինված ուժեր հարձակման փորձին և դրա հետևանքով ստեղծված իրավիճակին։ Փետրվարի 28-ին Կասպրշիկին ընդունել է նաև Արցախի ղեկավար Բակո Սահակյանը: