ՊԲ առանձին հրետանային զորամասերից մեկում պահեստազորի շարքային կազմի հետ անցկացվել են ուսումնավարժական հավաք-պարապմունքներ։ Այս մասին հայտնի է դարձել ՊԲ «Գոյամարտ» հաղորադաշարի փետրվարի 25-ի թողարկումից։
Տեսանյութից պարզ է դառնում, որ վարժանքներին կիրառվել է «Ֆագոտ» հակատանկային հրթիռային համակարգ։
Պահեստազորայինների վարժանքներին կիրառվել է «Ֆագոտ» հակատանկային հրթիռային համակարգ
Վարժանքներին շեշտը դրվել է մասնագիտական, մարտավարական տեխնիկական պատրաստությունների վրա։ Հավաքների ղեկավարության կողմից ուսումնասիրվել և ուսումնական ծրագրում ներառվել է նաև ապրիլյան պատերազմի փորձը։
Հավաքների նպատակն այն է, որ պահեստազորայինները վերհիշեն և ամրապնդեն իրենց գիտելիքներն ու ունակությունները։ Հավաքների վերջում պահեստազորայինները հանձնել են ստուգարքներ։
Նշենք, որ Պաշտպանության բանակի 2017 թվականի պատրաստության պլանի համաձայն` պահեստազորայինների ուսումնավարժական հավաքներ էին անցկացվել նաև այս տարվա հունվարին՝ ըստ առանձին մասնագիտական ուղղությունների: Նմանատիպ հավաքներ Պաշտպանության բանակում անցկացվել էին նաև 2016-ի սեպտեմբերին:
Ավելի վաղ՝ հունվարի 15-ին, ՀՀ Պաշտպանության նախարարը Հանրային հեռուստաընկերության եթերում հայտնել էր, որ ՀՀ գրեթե 200 հազար քաղաքացի անցել է մարտական հերթապահություն և այսօր պահեստազորում է: