Մոսուլի օդանավակայանը ազատագրվել է

Իրաքի կառավարական բանակը ազատագրել է «Իսլամական պետության» ձեռքում գտնվող Մոսուլ քաղաքի օդանավակայանը և մոտաակայքում գտնվող «Գազանի» ռազմաբազան: Մարտեր շարունակվում են վերահսկողությունն ամրապնդելու համար: Այս մասին հայտնում է Reuters գործակալությունը:

Մարտերին կառավարական բանակի ուժերից բացի, ներգրավված են նաև Իրաքի ոստիկանության և ՆԳ նախարարության ստորաբաժանումներ: «Իսլամական պետությունը» իրավիճակը շտկելու նպատակով հիմնականում օգտագործում է մեծ թվով ինքնաշեն պայթուցիկ սարքերով բեռնված մեքենաներ:

Օդանավակայանը և ռազմաբազան տեղակայված են քաղաքի հարավում: Քաղաքի արևմտյան մասում դրանք ահաբեկիչների պաշտպանության առաջին գիծն են: Օդանավակայանի ազատագրումից հետո ԻՊ-ի համար դժվար կլինի քաղաքի հարավից արևմուտք աջակցություն ստանալ:

Հավելենք, որ CNN լրատվակայքը, մեջբերելով ԱՄՆ գլխավորած միջազգային կոալիցիայի խոսնակին,  հայտնում է, որ վերջին 2 ամսվա ընթացքում ԻՊ կողմից բացված կրակի ընթացքում Մոսուլում ԱՄՆ ԶՈւ զինծառայողներ են վիրավորվել: Խոսնակը, սակայն, զինծառայողների թվի և վիրավորվորների մասին հավելյալ տեղեկություն հրաժարվել է հայտնել:

Հիշեցնենք, որ ավելի վաղ՝ փետրվարի 19-ին, Իրաքի վարչապետ Հայդար ալ-Աբադին հայտարարել էր ԻՊ-ից Մոսուլի արևմտյան մասի ազատագրման գործողության մեկնարկի մասին: Գործողության շրջանակներում ԱՄՆ գլխավորած միջազգային կոալիցիան ևս ավիահարվածներ է հասցնում քաղաքի ԻՊ դիրքերին։

Մոսուլ քաղաքի և հարակից տարածքների ազատագրման գործողության մեկնարկի մասին հայտնել է Իրաքի վարչապետը 2016 թվականի հոկտեմբերի 17-ին։ Գործողությանը մասնակցում են Իրաքի կառավարական բանակի, քրդական Փեշմերգե զորաջոկատների մարտիկներ, ինչպես նաև շիա աշխարհազորայիններ:

Մոսուլի ազատագրմանը աջակցում է նաև ԱՄՆ գլխավորած կոալիցիան, որը ավիահարվածներ է հասցնում Մոսուլում տեղակայված ԻՊ դիրքերին:

Հիշեցնենք նաև, որ 2014 թվականի հունիսին ԻՊ զինյլաներին հաջողվել էր Մոսուլից դուրս մղել կառավարական բանակը և սահմանել հսկողություն մեծությամբ երկրորդ իրաքյան քաղաքի վրա։

One response to “Մոսուլի օդանավակայանը ազատագրվել է

  1. Pingback: Իրաքի բանակը մուտք է գործել արևմտյան Մոսուլ | Ռազմ.info

Մեկնաբանել

Ձեր էլ. փոստի հասցեն չի հրատարակվելու: Պարտադիր դաշտերը նշված են *