Փետրվարի 22-ին «Ստոկհոլմի խաղաղության միջազգային հետազոտությունների ինստիտուտը» (SIRPI) հրապարակել է 2016 թ. զենքի համաշխարհային առևտրի վերբերյալ սեփական հետազոտությունը, համաձայն որի՝ 2016 թ. Ադրբեջանը ներկրել է 257 մլն դոլարի սպառազինություն: Ադրբեջանին զենքի արտահանումների հիմնական մասը բաժին է ընկել Իսրայելին՝ 248 մլն դոլարի:
Հատկանշական է, որ 2016 թ. Ադրբեջանին զենքի մատակարարումների ցուցակում նշված են նաև իսրայելական արտադրության «Երկաթե գմբեթ» հակահրթիռային պաշտպանության համակարգեր: Սակայն ադրբեջանական կողմն ինքը 2016 թ. վերջին հայտարարել էր, որ այդ պահի դրությամբ միայն նշված համակարգերը ձեռք բերելու բանակցություններ են տարվում:
Ըստ այդմ, ինչպես արդեն նշել ենք, սա ընդամենը նշված ինստիտուտի սեփական հետազոտության արդյունքն է, և կարող է մի շարք անճշտություններ պարունակել:
Ավելացնենք, որ ադրբեջանական լրատվամիջոցներից մեկը, նույն ինստիտուտի հետազոտության արդյունքներին հղում անելով, գրում է, իբր միայն 2016 թ. Ադրբեջանը Բելառուսից գնել է 170 մլն դոլարի սպառազինություն: Սակայն, իրականում, սույն հետազոտության մեջ նշվում է, որ Բելառուսը 2014-16 թթ. Ադրբեջանի առհասարակ զենք չի վաճառել, իսկ 2010-13 թթ. վաճառել է ընդամենը շուրջ 69 մլն դոլարի սպառազինությունը:
Այստեղ հետաքրքրիր է նաև մեկ այլ հանգամանք ևս, որ, համաձայն SIRPI-ի տվյալների, 2012-16 թթ. Ադրբեջանն Իսրայելից գնել է ընդհանուր առմամաբ շուրջ 438 մլն ԱՄՆ դոլարի սպառազինություն: Հիշեցնենք, որ Ադրբեջանի նախագահը հայտարարում էր 5 մլրդ դոլար արժողությամբ զենքի գնումների պայմանագրերի առկայության մասին, որոնց հիմնական մասը, ըստ Ալիևի հայտարարության՝ «մեծ մասն արդեն իրականացվել է»:
Ավելացնենք, որ համաձայն SIRPI-ի տվյալների՝ 2012-16 թթ. Ադրբեջանը ընդհանուր առմամբ ներկրել է շուրջ 1,9 մլրդ դոլարի սպառազինություն: Ադրբեջանին սպառազինություն տրամադրած երկրների ցանկը (տվյալները՝ մլն ԱՄՆ դոլարով).
2012 | 2013 | 2014 | 2015 | 2016 | ∑ | |
Բելառուս | 37 | 32 | — | — | — | 69 |
Իսրայել | 9 | 25 | 21 | 121 | 248 | 423 |
Ռուսաստան | 256 | 319 | 559 | 207 | — | 1341 |
Հվ. Աֆրիկա | 10 | 2 | 3 | 1 | — | 16 |
Թուրքիա | 20 | 5 | 17 | 9 | 9 | 60 |
Ուկրաինա | 6 | 15 | — | — | — | 21 |
ԱՄՆ | 2 | 0 | 1 | — | — | 3 |
Ընդհանուր | 339 | 398 | 601 | 338 | 257 | 1933 |
Հիշեցնենք, որ նույն ինստիտուտը փետրվարի 20-ին հրապարակել էր մեկ այլ հետազոտություն, համաձայն որի՝ 2007-2011 թվականների համեմատությամբ՝ 2012-2016 թթ ժամանակահատվածում Ադրբեջանի սպառազինության ներկրումների ծավալը մեծացել է 75 տոկոսով: