Փետրվարի 20-ին Թուրքիայի ռազմաօդային ուժերի ինքնաթիռները 2 առանձին ավիահարված են հասցրել Իրաքի հյուսիսային շրջաններում «Քրդստանի աշխատավորական կուսակցության» (PKK) դիրքերին: Այս մասին հայտնում է թուրքական պետական «Անադոլու» գործակալությունը:
Հարվածների արդյունքում ընդհանուր առմամբ սպանվել է PKK-ի 34 զինյալ: Հարվածները մասնավորապես հասցվել են Զափ շրջանում:
Բացի այս, փետրվարի 19-ին Թուրքիայի օդուժը կրկին հարվածել է Զափ, ինչպես նաև Ավաշին-Բասյան շրջաններում PKK-ի դիրքերին: Հայտնում է թուրքական «Հյուրիեթ» պարբերականի կայքը: Ըստ աղբյուրի՝ ոչնչացվել է PKK-ի 4 թիրախ և 8 զինյալ: Նշենք, որ այս շրջաններում քրդական կառույցի բազաներ են տեղակայված։
Հիշեցնենք, որ վերջին շրջանում Թուրքիայի զինուժը կրկին ինտենսիացրել է հարվածները Իրաքի հյուսիսում PKK-ի դիրքերին: Թուրքիան Իրաքում քրդերի դիրքերին հատկապես ինտենսիվ հարվածներ հասցրել էր հունվարի 10-12-ին: Այդ ընթացքում թուրքական կողմը հայտնել էր PKK-ի դիրքերին ավիահարվածներ հասցնելու առնվազն 3 տարբեր գործողությունների իրականացման մասին։ Հունվարի 18-ին և հունվարի 25-ին թուրքական օդուժը կրկին հարվածել էր Իրաքում քրդերի դիրքերին (1, 2)։
Pingback: Թուրքիան իր տարածքում և Իրաքի հյուսիսում հարվածել է PKK դիրքերին | Ռազմ.info