Արցախի տարածքը ականներից և չպայթած զինամթերքից մաքրող «Հալո Թրաստ» (Halo Trust) կազմակերպությունը հրապարակել է 2016-ին կատարած աշխատանքների հաշվետվությունը, ըստ որի տարվա ընթացքում կազմակերպության աշխատակիցները ոչնչացրել են 159 ական, կասետային զինամթերքի 165 պայթուցիկ մնացորդ, 2 ավիառումբ և 77 կտոր այլ չպայթած զինամթերք: Այս մասին Ռազմինֆոյին հայտնում են կազմակերպության՝ Արցախի մասնաճյուղից:
Ադրբեջանի բանակի «Սմերչ» համակարգից կրակված հրթիռի մնացորդը Արցախի Ջաբրայիլում (լուսանկարը՝ «Հալո Թրաստի», մայիս 2016)
Ընդհանուր առմամբ՝ 2016 թվականին կազմակերպությունը ականներից մաքրել է 24 ականադաշտ, ինչի արդյունքում մոտ 90 հեկտար տարածք վերադարձվել է համայնքներին՝ հողագործության համար:
Դրանից բացի, կազմակերպության ներկայացուցիչները ոչնչացրել են նաև 170 կտոր չպայթած զինամթերք, որոնց մասին կազմակերպությանը ահազանգել են զինամթերքը հայտնաբերած բնակիչները:
«Հալո Թրաստ» կազմակերպության ներկայացուցիչները նաև ուսումնական ծրագրեր են իրականացրել, որոնց ընթացքում Արցախի 10 հազար բնակչի ուսուցանել են ականային վտանգի մասին և պատրաստել են 60 մասնագետ:
Կազմակերպության հաշվետվության մեջ նշվում է, որ իրենք կարողացել են հավաքել ամբողջ Արցախն ականներից մաքրելու համար անհրաժեշտ 4 մլն դոլարի 20 տոկոսը: Հիշեցնենք, որ կազմակերպությանը նպատակն է Արցախի տարածքն ականներից և չպայթած զինամթերքից ամբողջությամբ մաքրել մինչև 2020 թվականը:
Մինչ 2016 թվականը կազմակերպության ներկայացուցիչները մաքրում էին դեռևս Արցախյան պատերազմից մնացած ականները և չպայթած զինամթերքը, սակայն դրան ավելացավ Ապրիլյան պատերազմի հետևանքով մնացած զինամթերքը: Մասնավորապես մայիսի սկզբին կազմակերպությունը հրապարակել էր Մարտակերտի Ներքին Հոռաթաղ և Մոխրաթաղ գյուղերի տարածքներում ադրբեջանական հրետակոծություններից մնացած չպայթած զինամթերքի քարտեզը:
Rapid assessment of new #clustermunition strikes in #Karabakh has allowed HALO to establish the footprint (extent) pic.twitter.com/WxoG4RdtXz
— HALO NagornoKarabakh (@HALO_NK) May 6, 2016
Ավելի ուշ՝ հունիսին, «Հալո Թրաստ» կազմակերպությունը տվյալներ ներկայացրեց, ըստ որոնց՝ Արցախում չպայթած զինամթերքից և ականներից մաքրելու ենթակա տարածքներն Ապրիլյան մարտերից հետո ավելացել են 2,4 մլն քառ. մետրով (240 հեկտար): Վտանգավոր տարածքներ կան Մարտակերտում, Ներքին Հոռաթաղում – Մոխրաթաղ հատվածում, Մատաղիսում, ինչպես նաև Մարտունու և Հադրութի շրջաններում: Չպայթած զինամթերքի մասին կազմակերպության ներկայացրած թվերը կարող եք տեսնել այստեղ:
Կազմակերպության ներկայացուցիչներն արձագանքել են նաև ադրբեջանական հրետակոծության հետևանքով բնակավայրերի մոտ մնացած բեկորների ու չպայթած զինամթերքի մասին բնակիչների ահազանգերին: Որոշ դեպքերում դրանք եղել են կասետային ռումբերի պայթուցիկ մնացորդներ, «Սմերչ» համակարգերի հրթիռների մնացորդներ և այլն:
Ավելացնենք, որ «Հալո Թրաստը» բրիտանական կազմակերպություն է, որը դոնորների հանգանակած գումարներով Հայաստանի (ներառյալ Արցախի) տարածքների ականազերծում է իրականացնում դեռևս 2000 թվականից սկսած:
Կազմակերպության տվյալներով՝ ականազերծման աշխատանքների արդյունքում վերջին 10 տարիներին զգալիորեն նվազել է Արցախում ականների պայթյուններից տուժողների քանակը:
In the last 10 yrs, #landmine & #uxo accidents have been falling in #nagornokarabakh thanks to the efforts of our demining teams #minefreenk pic.twitter.com/hUPN2n3gHk
— HALO NagornoKarabakh (@HALO_NK) January 12, 2017
Կազմակերպությունը մտադիր է Արցախի տարածքն ականներից և չպայթած զինամթերքից մաքրել մինչև 2020 թվականը:
Ստորև «Հալո Թրաստի» քարտեզն է, որում կանաչ գույնով նշված են արդեն մաքրված ականադաշտերը, կարմիրով՝ մինչև 2020թ. մաքրվելիք տարածքները:
?= cleared minefields ? = #minefields to be cleared in #Nagornokarabakh Our goal is to change the red dots to green by 2020 #minefreenk pic.twitter.com/QloOcUoLYT
— HALO NagornoKarabakh (@HALO_NK) January 7, 2017
Pingback: Բերձորի գյուղերից մեկը ականազերծելու համար կազմակերպվել է դրամահավաք | Ռազմ.info