Իրանում «Իսլամական պետություն» ահաբեկչական խմբավորման անդամներ են ձերբակալվել

Փետրվարի 3-9-ը Իրանի հետախուզության և անվտանգության ուժերը Թեհրանի հարակից շրջաններում և արևմտյան ու արևելյան որոշ նահանգներում իրականացրած  հակաահաբեկչական գործողությունների արդյունքում ձերբակալել են 8 ահաբեկչի։ Ահաբեկիչները Իրանի քաղաքացիներ չեն եղել։

Այս մասին փետրվարի 11-ին  հայտարարել է Իրանի հետախուզության և  ազգային անվտանգության նախարար Սեյիդ Մոհամադ Ալավին։ Փոխանցում է իրանական «Թասնիմ» լրատվական գործակալությունը։

Իրանի ԶՈւ «Իմամ Զաման» ռազմական հետախուզության զինվորներ

Ինչպես ավելի վաղ հայտնի էր դարձել՝ ձերբակալվածները «Իսլամական պետություն» ահաբեկչական խմբավորման անդամներ են եղել։

Ըստ հայտարարության՝ ահաբեկիչները նպատակադրվել էին խափանել Իսլամական հեղափոխության 38-րդ տարեդարձին նվիրված տոնակատարությունները։ Ահաբեկիչներից առգրավվել է նաև Կալաշնիկովի ավտոմատներ և այլ զինամթերք։

Հիշեցնենք, որ ավելի վաղ Իրանի արևմուտքում հետախուզության և անվտանգության ուժերը վնասազերծել էին 3 հոգանոց ահաբեկչական խումբ: Ըստ ոչ պաշտոնական աղբյուրների՝ նրանք նույնպես «Իսլամական պետություն»  խմբավորման անդամ են եղել:

Նշենք, որ 2016թ հունիսից Իրանը երկրի հյուսիս-արևմուտքում և հարավ-արևելքում ահաբեկչական խմբավորումների դեմ ակտիվ պայքար է մղում: Հունիս-հուլիս ամիսներին իրականացրած հակաահաբեկչական գործությունների արդյունքում ձերբակալվել և ոչնչացվել են մի քանի տասնյակ ահաբեկիչներ:

Իսկ օգոստոսի 3-ին Իրանի ոստիկանության և անվտանգության ուժերը վնասազերծել են «Թաուհիդ և Ջիհադ» ահաբեկչական խմբավորման 102 զինյալի: Արևմտյան և հյուսիս-արևմտյան Իրանում խմբի ծավալած գործողություններից  տուժել է 60 իրանցի (20 զոհ, 40 վիրավոր):

Իրանի հյուսիս-արևմուտքում  ընդհանուր առմամբ գործում է 5 ծայրահեղական խմբավորում: Ստորև ինտերակտիվ ժամանակագրությամբ ներկայացրել ենք վերջին շրջանում Իրանի անվտանգության ուժերի գործողություններն ընդդեմ ահաբեկչական խմբավորումների: