Հունվարի 31-ին ՀՀ պաշտպանության նախարար Վիգեն Սարգսյանը Իրանում հանդիպել է այդ երկրի պաշտպանության և զինված ուժերի աջակցման նախարար Հոսեյն Դեհղանին։ Քննարկվել են երկկողմ, տարածաշրջանային և միջազգային հարաբերություններին վերաբերող հարցեր։ Այս մասին հայտնում է Իրանի ՊՆ կայքը։
Հանդիպման ընթացքում նախարարները պատրաստակամություն են հայտնել խորացնել և ընդլայնել երկկողմ հարաբերությունները:
Հայաստանի պաշտպանության նախարար Վիգեն Սարգսյանը և Իրանի պաշտպանության նախարար Հոսեյն Դեհղանը
Անդրադառնալով Արցախյան հակամարտությանը՝ Սարգսյանը նշել է, որ այն ռազմական լուծում չունի։
Մենք դեմ ենք տարածաշրջանում ցանկացած տեսակի հակամարտությանը և գնահատում ենք այդ հակամարտություններն ու ճգնաժամերը զսպելու Իրանի ջանքերը, մենք Իրանին տարածաշրջանում խաղաղություն տարածող ենք համարում։ Մենք ամբողջովին համաձայն ենք հակաահաբեկչական պայքարում Իրանի դիրքորոշման հետ և պատրաստ ենք համագործակցել այդ ոլորտում, -հայտարարել է Սարգսյանը։
Իր հերթին նախարար Դեհղանը կարևորել է տարածաշրջանում հակամարտությունների խաղաղ կարգավորման անհրաժեշտությունը։
Նշենք, որ պաշտոնական այցի շրջանակներում ՀՀ պաշտպանության նախարարը հանդիպումներ կունենա նաև ԻԻՀ գործադիր և օրենսդիր իշխանության մարմինների բարձրաստիճան ղեկավարության հետ, կայցելի տարբեր գիտահետազոտական և արդյունաբերական ձեռնարկություններ:
Թեհրանում գտնվելու ընթացքում ՀՀ պաշտպանության նախարարը կհանդիպի նաև Իրանի հայ համայնքի ներկայացուցիչների հետ:
Հիշեցնենք, որ նախատեսվող այցի մասին ՀՀ պաշտպանության նախարարը հայտնել էր հունվարի 27-ի ասուլիսի ժամանակ:
Pingback: Վիգեն Սարգսյանն այցելել է իրանական ընկերություններ | Ռազմ.info