Դամասկոսի նահանգում զենքը վայր է դրել Սիրիայի զինյալ խմբավորումների 2600 զինյալ

Սիրիայում կռվող զինյալ խմբավորումների հաշտեցման ռուսաստանյան կենտրոնի ներկայացուցիչ, գնդապետ Ալեքսանդր Բլինկովը հայտարարել է, որ Դամասկոսի նահանգում զենքը վայր է դրել տարբեր խմբավորումների շուրջ 2,600 զինյալ: Փոխանցում է ռուսաստանյան «ՌԻԱ Նովոստի» գործակալությունը:

Վերահսկողության գոտիների փոփոխությունը Սիրիայում և Իրաքում. 2015 օգոստոս – 2016 դեկտեմբեր

Զենքը վայր դրած զինյալները, սիրիական իշխանությունների համաձայնությամբ, իրենց ընտանիքների հետ միասին հեռանում են Սիրիայի հյուսիսարևմտյան Իդլիբ նահանգ: Այն զինյալները, ովքեր պատրաստ են վերականգնել իրենց իրավական կարգավիճակը, կարող են համալրել Սիրիայի կառավարական բանակի շարքերը:

Ըստ աղբյուրի՝ միևնույն ժամանակ Դամասկոսին խմելու ջրով ապահովող Բարադա գետի հովտում բնակվող խաղաղ քաղաքացիները վերադառնում են իրենց բնակավայրերը:

Նշենք, որ սկսած 2016-ի դեկտեմբերի վերջից Սիրիայի կառավարական ուժերը բախումների են գնում զինյալ խմբավորումների դեմ Դամասկոսից արևելք ընկած Բարադա գետի շրջանում, որը գտնվում է ընդդիմադիր, զինյալ խմբավորումների ձեռքում:

Դեկտեմբերի 24-ին զինյալների կողմից Բարադա գետի հովտում գտնվող Այն ալ-Ֆիջահ բնակավայրի պոմպակայանը, ինչի հետևանքով Դամասկոսի շուրջ 5 միլիոն բնակչություն զրկվել է խմելու ջրից:

Հունվարի 23-24-ին Ղազախստանի մայրաքաղաք Աստանայում Սիրիայի ճգնաժամի լուծմանն ուղղված բանակցություններում կարևոր հարցերից է եղել նաև Բարադա գետի ազատագրումը: Հունվարի 24-ին Աստանայում քննարկումների ժամանակ ՄԱԿ-ում Սիրիայի մշտական ներկայացուցիչ Բաշար ալ-Ջաֆարին հայտարարել է, որ մինչև ահաբեկիչները ջուր չտրամադրեն Դամասկոսի բնակչությանը, Սիրիայի կառավարական բանակը շարունակելու է մարտերը նրանց դեմ:

Ըստ Ջաֆարիի այդ գետը խմելու ջրով է ապահովվում  Դամասկոսի շուրջ 7 միլիոն բնակչությանը և արդեն 40 օր է, ինչ նրանք զրկված են ջրից:

Նշենք, որ հունվարի 23-24-ին Աստանայում չի հաջողվել առանձին քննարկման սեղանի շուրջ նստեցնել Սիրիայի կառավարության և ընդդիմադիր զինյալ խմբավորումների ներկայացուցիչներին: Մյուս կողմից, Թուրքիան, Ռուսաստանը և Իրանը համաձայնության են հասել Սիրիայում հրադադարի պահպանման եռակողմ մեխանիզմի մշակման շուրջ: Աստանայում բանակցությունների մասին առավել մանրամասն այստեղ:

Հիշեցնենք, որ Սիրիական կառավարությունը և զինյալ խմբավորումները համաձայնել են Թուրքիայի և Ռուսաստանի երաշխավորությամբ դեկտեմբերի լույս 30-ի կեսգիշերից հրադադար հաստատել: Հրադադարը չի տարածվում «Իսլամական պետություն», «ալ-Նուսրայի Ճակատ» ահաբեկչական խմբավորումների վրա, ինչպես նաև այն խմբավորումների, որոնք կխախտեն հրադադարի ռեժիմը։