ՌԴ ԶՈՒ Գլխավոր շտաբի պետ գեներալ Նիկոլայ Մակարովը առաջիկայում կազատվի աշխատանքից: Նրա փոխարեն այդ պաշտոնում կնշանակվի ՌԴ Կենտրոնական ռազմական շրջանի զորքերի հրամանատար գեներալ-գնդապետ Վալերի Գերասիմովը:
Այդ մասին հայտնում է ITAR-TASS գործակալությունը՝ վկայակոչելով ՌԴ ԳՇ աղբյուրը:
Նույն աղբյուրի փոխանցմամբ՝ երեկ առավոտյան ՌԴ Պաշտպանության նորանշանակ նախարար Սերգեյ Շոյգուն առանձնազրույց է ունեցել Գերասիմովի հետ՝ նրան ՌԴ ԶՈՒ ԳՇ պետի պաշտոնում նշանակելու մասին:
Պաշտպանության նախարարը կադրային հարցերով խորհրդակցություն է հրավիրել ՌԴ ԶՈՒ բարձրագույն ղեկավար կազմի հետ, որի մասնակցել են ՌԴ պաշտպանության նախարարի տեղակալները, ՊՆ գլխավոր և կենտրոնական վարչությունների պետերը, ռազմական շրջանների և նավատորմերի հրամանատարները:
Հիշեցնենք, որ նոյեմբերի 6-ին ՌԴ նախագահ Վլադիմիր Պուտինը ՌԴ պաշտպանության նախարարի պաշտոնից ազատել է Անատոլի Սերդյուկովին և այդ պաշտոնում նշանակել Մոսկվայի նահանգապետի պաշտոնն զբաղեցրած, նախկինում ՌԴ Արտակարգ իրավիճակների նախարար Սերգեյ Շոյգուին: