«Արենա-Մ» ակտիվ պաշտպանության համակարգը, որ նախատեսված է ռուսաստանյան արտադրության Տ-72 և Տ-90 տանկերի վրա տեղադրվելու համար, արդեն փորձարկումներ է անցնում Ռուսաստանում: Այս մասին ռուսաստանյան «ՏԱՍՍ» գործակալությանը հունվարի 19-ին հայտնել է համակարգը նախագծող ընկերության գլխավոր կոնստրուկտոր Վալերի Կաշինը:
Համակարգի նպատակն է հայտնաբերել տանկի ուղղությամբ թռչող հրթիռներն ու արկերը, արձակել «հակահրթիռ» և դրա պայթյունով ոչնչացնել հակառակորդի հրթիռը:
Համակարգի այս տարբերակը նախկինում պատրաստված «Արենա» համակարգի արդիականացված-փոփոխված տարբերակն է: Ընկերության ներկայացուցիչը նշել է, որ արդիականացումը կատարվել է տանկերն արտադրող ընկերության պատվերով:
Նրա խոսքով՝ մերձավորարևելյան հակամարտությունների փորձը ցույց է տալիս, որ տանկի պաշտպանության այլ միջոցները, այդ թվում՝ դինամիկ պաշտպանությունը, անարդյունավետ են, և տանկերի վրա պետք է տեղադրել հենց ակտիվ պաշտպանության համակարգեր:
Մինչ Ռուսաստանում փորձարկում են ակտիվ պաշտպանության իրենց նոր համակարգը, Իսրայելում նմանատիպ «Թրոֆի» համակարգն արդեն անցել է զորային փորձարկումներ ու տեղադրված է Իսրայելի զինված ուժերի տանկերի մի մասի վրա: Ավելին, 2014թ. ամռանն այդ համակարգը «մարտական մկրտություն» է ստացել պաղեստինցիների դեմ մարտերում:
Իսրայելից բացի, սեփական զրահատեխնիկայի ակտիվ պաշտպանության համակարգեր ստեղծելու մտադրությունների մասին հայտարարել են նաև Իրանը, Թուրքիան և Հնդկաստանը: ԱՄՆ-ում նույնպես քննարկվում է տանկերն ու այլ զրահատեխնիկան նման համակարգերով պաշտպանելու տարբերակը:
Մյուս կողմից, ակտիվ պաշտպանության համակարգերի կիրառման դեպքում հակատանկային հրթիռի ու «հակահրթիռի» պայթյունից առաջացող հարվածային ալիքն ու բեկորները կարող են խոցել հենց սեփական հետևակային զինծառայողներին: