Ամերիկյան կողմը ՌԴ ԶՈւ օդաչուներին մեղադրում է Սիրիայում ռազմական գործողությունների ընթացքում միջադեպերի կանխման երկկողմանի հուշագիրը խախտելու, մասնավորապես՝ Սիրիայի օդային տարածքում ԱՄՆ ՌԾՈւ ինքնաթիռներին մոտենալու և սահմանված անվտանգ հեռավորությունը չպահելու համար: Այս մասին հայտնում է ամերիկյան The Wall Street Journal պարբերականը:
Ռուսաստանյան կողմն այս մեղադրանքին պաշտոնապես չի արձագանքել:
Մինչ այս՝ 2015-ի հոկտեմբերին ՌԴ և ԱՄՆ պաշտպանության նախարարություները ստորագրել էին Սիրիայում ռազմական գործողությունների ընթացքում միջադեպերի կանխման և ավիացիայի թռիչքների անվտանգության ապահովման վերաբերյալ հուշագիր: Այն նպատակ ունի կանխել երկու երկրների օդային ուժերի միջև պատահարները։
Ամերիկացի օդաչուները հայտնել են, որ ռուսաստանցի օդաչուները երբեք ինքնաթիռի ուղղությունը չեն փոխում, շատ հազվադեպ են կապի դուրս գալիս, և փոխարենը իրենք են ստիպված լինում մի կողմ քաշվել:
ԱՄՆ ռազմաօդային ուժերի գնդապետ Դանիել Մենինգը լրատվամիջոցի հետ զրուցում ասել է, որ վիճակագրությամբ մարտական ինքնաթիռները ավելի հաճախ կործանվում են մեխանիկական անսարքությունների պատճառով, քան խոցվում են: Այնուամենանիվ, պատերազմական պայմաններում մարդկանց կողմից այն կընկալվի որպես ագրեսիա:
Հիշեցնենք, որ 2015-ի սեպտեմբերի 30-ից Ռուսաստանը Սիրիայի նախագահ Բաշար Ասադի խնդրանքով սկսել է կետային ավիահարվածներ հասցնել Սիրիայում ԻՊ դիրքերին:
Իսկ ԱՄՆ գլխավորած միջազգային կոալիցիան ձևավորվել է 2014-ին և «Իսլամական պետություն» ահաբեկչական խմբավորման դեմ հիմնականում օդային գործողություններ է իրականացնում ինչպես Սիրիայի, այնպես էլ Իրաքի տարածքներում: