Այսօր՝ դեկտեմբերի 26-ին, ՀՀ պաշտպանության նախարար Վիգեն Սարգսյանը և ՀՀ ԶՈՒ գլխավոր շտաբի պետ, գեներալ-լեյտենանտ Մովսես Հակոբյանն այցելել են Հանրապետական հավաքակայան՝ հունվարի 9-ին մեկնարկող ձմեռային զորակոչին ընդառաջ Հանրապետական հավաքակայանում իրականացվող նախապատրաստական վերջին աշխատանքները տեղում դիտարկելու, զորակոչային գործընթացում ներգրավված ծառայությունների և ստորաբաժանումների պատրաստությունը ստուգելու համար: Այս մասին հայտնում է ՀՀ ՊՆ կայքը:
ՀՀ պաշտպանության նախարարին և ԶՈւ գլխավոր շտաբի պետին ներկայացնում են զորակոչիկների՝ զորամասն ընտրելու վիճակահանության կարգը
Ստուգայցի ընթացքում ՀՀ պաշտպանության նախարարին և ԶՈՒ ԳՇ պետին են ներկայացվել զորակոչիկների դիմավորման ու ընդունման կետում, զորակոչիկների բուժզննման սենյակներում, վիճակահանության դահլիճում, հանդերձավորման կետում, զորակոչիկների ծնողների ու հարազատների համար կահավորված սպասասրահում ստեղծված հնարավորությունները, վիճակահանության ընթացակարգին առնչվող փոփոխություններ:
Վիգեն Սարգսյանի և Մովսես Հակոբյանի ուշադրության կենտրոնում են եղել հատկապես մրսածության դեպքերը բացառելուն ուղղված միջոցառումների կազմակերպումը, հանրապետական հավաքակայանի սենյակներում անհրաժեշտ ջերմային ռեժիմի ապահովման հարցեր: Դիտարկվել են նաև բժշկական հանձնաժողովի բժիշկ-մասնագետների կողմից իրականացվող աշխատանքները և զորակոչիկներին զինվորական հանդերձանքի հատկացման կարգը:
Զրուցելով զորակոչի նախապատրաստական աշխատանքներում ներգրավված կառույցների պատասխանատուների հետ՝ պաշտպանության նախարար Վիգեն Սարգսյանը և ԶՈՒ ԳՇ պետ Մովսես Հակոբյանը տվել են համապատասխան ցուցումներ և հանձնարարականներ:
Ավելի վաղ հայտնի էր դարձել, որ ՀՀ ԶՈւ զորակոչի անցկացման կարգում նախատեսված փոփոխություններով՝ առաջիկա ձմեռային զորակոչի ժամանակ, ի տարբերություն նախորդ տարիների, զորակոչիկները զինվորական համազգեստ կստանան հենց հանրապետական կենտրոնական հավաքակայանում՝ մրսածության դեպքերը բացառելու համար։
Մեկ այլ փոփոխությամբ՝ տարածքային զինկոմիսարիատներում առցանց տեսարձակվելու է նորակոչիկների՝ զորամասը վիճակահանությամբ ընտրելու ընթացքը, և ծնողները հնարավորություն կունենան հենց զինկոմիսարիատներում հետևելու այդ տեսարձակմանը: