Դեկտեմբերի 22-ին, Ադրբեջանի ՊՆ-ն հայտնել է «Իլդիրիմ» զենիթահրթիռային համալիրներով վարժանքների անցկացման մասին: Սակայն, դատելով համակարգերի տեսքից, Ադրբեջանի ԶՈւ հակաօդային պաշտպանության ստորաբաժանումները մարտական կրակով վարժանքներ են անցկացրել իսրայելական արտադրության Barak-8 ԶՀՀ-ներով:
Ադրբեջանի պաշտպանության նախարարության կայքը հայտնում է, որ վարժանքներին ներկա են եղել Ադրբեջանի ՊՆ գեներալ-գնդապետ Զաքիր Հասանովը, զինված ուժերի գլխավոր շտաբի պետ, գեներալ-գնդապետ Նեջմեդդին Սադիկովը, ռազմաօդային ուժերի հրամանատարը, գեներալ-լեյտենանտ Ռամիզ Թահիրով:
Ադրբեջանի ԶՈւ ՀՕՊ ուժերի Barak-8 ԶՀՀ
Նշենք, որ բացի արտաքին տեսքից, այդ համակարգերի իսրայելական լինելու մասին խոսում է նաև այն, որ «Բարաք» (եբր. ברק) եբրայերենից թարգմանաբար նշանակում է «կայծակ», իսկ ադրբեջաներեն՝ հենց «Իլդիրիմ»:
Barak-8 ԶՀՀ-ները համատեղ արտադրում են Իսրայելական Israel Aerospace Industries (IAI) և հնդկական Defence Research & Development Organisation կազմակերպությունը: ԶՀՀ-ները նախատեսված են ինչպես ծովային, այնպես էլ ցամաքային տեղակայման համար: Ըստ տարբեր աղբյուրների՝ այս համակարգերը թիրախը կարող են որսալ 70 կմ հեռավորությունից՝ 25 կմ բարձրության վրա:
Այդ համալիրները նախատեսված չեն հակառակորդի արձակած բալիստիկ հրթիռները որսալու համար: Կարող են օգտագործվել հակառակորդի ինքնաթիռները, ուղղաթիռները, անօդաչու թռչող սարքերը չեզոքացնելու նպատակով: Փորձարկվել են անօդաչու-թիրախների վրա հիմնականում:
Barak-8 հրթիռների առավելագույն արագությունը շուրջ 650-700 մ/վրկ է:
Անդրադառնալով ադրբեջանական լրատվամիջոցներում տարածվող տեղեկություններին, թե իբր այս համակարգերը «կարող են Իսկանդերների հրթիռներ որսալ», նշենք, որ չեն կարող: Այս մասին առավել մանրամասն խոսել ենք իսրայելական «Երկաթե գմբեթների» մասին նմանատիպ տեղեկությունը բացատրելիս:
Վարժանքների ընթացքում Barak-8 համակարգերից (հրապարակված լուսանկարներում երևում է երկու առանձին արձակման կայան) արձակված հրթիռներով խոցվել են պայմանական հակառակորդի թիրախի փոխարեն օդ արձակված թիրախներ: Դատելով հրապարակված տեսանյութից՝ դրանք թուրքական արտադրության Turna թիրախներ են (ԱԹՍ):
Իսրայելա-հնդկական արտադրության Barak-8 ԶՀՀ
Ավելացնենք, որ դեռևս 2011 թ. ռազմական հետազոտություններով զբաղվող SIPRI ինստիտուտը հայտնել էր, որ Ադրբեջանը 1,6 մլրդ դոլարի պայմանագիր էր կնքել Ադրբեջանի հետ, որը ենթադրում էր այդ թվում 200 մլն դոլարի 1 դիվիզիոն Barak-8 ԶՀՀ-ների տրամադրում Ադրբեջանին՝ ռազմաօդային և ռազմածովային ուժերի համար՝ իրենց հրթիռներով (6 արձակման կայան ու 75 միավոր հրթիռ):
Հետագայում՝ 2013 թ. դրությամբ, Հնդկաստանի զինուժի համար այս ԶՀՀ-ների փորձարկումը ցույց տվեց, որ դրանք արդյունավետ չեն գործում: Սակայն արդեն 2015-16 թթ. հնդկական և իսրայելական կողմերը առանձին փորձարկել են համակարգը: Երկուսն էլ հայտնում են հաջող փորձարկումների մաիսն (1, 2):
2016-ի մարտին Ադրբեջանի ՌՕՈւ և ՀՕՊ հրամանատար, գեներալ-լեյտենանտ Ռամիզ Թահիրովի հայտարարությունից պարզ է դառնում, որ Ադրբեջանը այդ պահի դրությամբ դեռ չէր գնել «Բարաք-8» ԶՀՀ-ներ: Գնման մասին իսրայելական լրատվամիջոցներից մեկում տվյալներ հայտնվեցին մայիսին:
Ադրբեջանի զինուժը փորձարկում է Barak-8 ԶՀՀ-ները
Ադրբեջանի զինուժը փորձարկում է Barak-8 ԶՀՀ-ները
Pingback: Ադրբեջանի ռազմական ոլորտում 2016-ի կարևոր իրադարձությունները | Ռազմ.info