Զինծառայողներին բնակարանով ապահովելու համար 2017 թվականին Հայաստանի պաշտպանության նախարարությունը նախատեսում է 10-ից ավելի բնակելի շենք կառուցել Երևանում, Գյումրիում, Գորիսում, Կապանում, Վայքում, Ստեփանակերտում, Քարվաճառում և այլ բնակավայրերում: Այս մասին ՀՀ ՊՆ «Հայ Զինվոր» պաշտոնաթերթի հետ հարցազրույցի ժամանակ հայտնել է ՀՀ ՊՆ կապիտալ շինարարության և զորքերի բնակավորման վարչության պետ Աշոտ Գրիգորյանը:
Պաշտպանության բանակի սպաների համար կառուցված բնակելի շենքերը՝ 176 բնակարաններով (արխիվ)
Պաշտոնյան նշել է, որ բնակարանների մի մասը զինծառայողների կհանձնվի 2018 թվականին, իսկ 2017 թվականին շահագործման կհանձնվեն Երևանում կառուցված 14-հարկանի շենքը (71 բնակարանով), Սանասարում (Կուբաթլի) կառուցված շենքը՝ 50 բնակարանով, և երկու բնակելի շենք Հադրութում:
Վարչության պետն ամփոփել է նաև 2016 թվականին կատարված աշխատանքները և նշել, որ ապրիլյան մարտական գործողությունները որոշակի փոփոխություններ են մտցրել ծրագրերում: Մասնավորապես առաջնահերթ աշխատանքներ տարվել են պատերազմի հետևանքով վնասված շենքերի ու այլ կառույցների վերականգնմանը և ամրացմանը: Կառուցվել են նաև ուսումնական մասնաշենքեր ու այլ շինություններ, Խնձորեսկում շահագործման է հանձնվել զինավան, ավարտվել է նաև Իջևանի զինավանի շինարարությունը և այլն:
«Հայ Զինվոր» թերթին տված նախորդ հարցազրույցի ժամանակ՝ 2015-ի դեկտեմբերին, վարչության պետ Աշոտ Գրիգորյանը նշել էր, որ տարվա ընթացքում նախատեսվում է նոր բնակելի շենքեր կառուցել Երևանում, Գյումրիում, Վայքում, Սիսիանում, Գորիսում, Ագարակում, Իջևանում, Մեհրաբում և Շահումյանում: Եվ բացի այդ, մեկական շենք էլ կվերակառուցվի ու կվերանորոգվի Կապանում և Վանաձորում:
Պաշտոնյան նշել էր, որ բնակարաններն արդեն պատրաստ կլինեն 2017 թվականին: Այդ տարի պաշտպանության նախարարությունը նախատեսում է ՀՀ ԶՈւ սպաներին հանձնել 393 բնակարան, որից 83-ը՝ Երևանում:
Ինչ վերաբերում է ընթացիկ տարվան, ապա 2016 թվականի ընթացքում ևս հայկական բանակի զինծառայողներին է հանձնվել մի քանի բնակելի շենք: Մասնավորապես փետրվարի 16-ին Մատաղիսում ՊԲ սպաներին էին հանձնել նոր բնակելի շենք՝ 24 բնակարանով: Նույն օրը Բակո Սահակյանը մասնակցել էր Մարտակերտում զինծառայողների համար նախատեսված ևս մեկ բազմաբնակարան շենքի հիմնարկեքի արարողությանը:
ՊԲ սպաների համար նախատեսված բնակարանների հանձնման հանդիսավոր արարողություն Արցախի Մատաղիսում 16.02.2016թ.
Հոկտեմբերի 31-ին էլ Արցախի ղեկավարը Ստեփանակերտում մասնակցել է Պաշտպանության բանակի սպաների և զոհված ազատամարտիկների ընտանիքների համար կառուցվելիք նոր բազմահարկ բնակելի շենքի հիմնարկեքի հանդիսավոր արարողությանը:
Իսկ դեկտեմբերի 8-10-ին Սյունիք և Արցախ կատարած այցի ընթացքում ՀՀ նախագահ Սերժ Սարգսյանը մասնակցել է նաև զորանոցները, զինավանները և զինծառայողների համար կառուցված բնակելի շենքերը հանձնելու հանդիսավոր արարողությունների (1, 2, 3, 4):
Pingback: 2017-ին ՀՀ ՊՆ-ից բնակարան կստանա 91 զինծառայող. Արմենպրես | Ռազմ.info