Սիրիայում ընթացող ռազմական գործողություններում սպանվել է Վրաստանի ևս մեկ քաղաքացի, Պանկիսի կիրճի բնակիչ, 20-ամյա Ռամզան Բաղակաշվիլին: Այս մասին դեկտեմբերի 13-ին հայտնել է վրաստանյան «Կվիրիս պալիտրա» թերթը:
Սիրիայում Բաղակաշվիլին կռվել է «Իսլամական պետություն» ահաբեկչական խմբավորման կազմում: Նա Սիրիա է տեղափոխվել 2015-ին, նրա հետ միասին եղել է նաև դեռևս անչափահաս Մուսլիմ Քութանաշվիլին, որի մասին տեղեկություններ հայտնի չեն:
Նշենք, որ 2015-ի հունիսին, երբ Բաղակաշվիլին և Քութանաշվիլին գնացել են Սիրիա, Վրաստանի ՆԳՆ զորքերը Պանկիսի կիրճում հատուկ գործողություն են իրականացրել, որի արդյունքում ձերբակալվել և ԻՊ-ին անդամակցելու համար դատապարտվել է 4 մարդ, այդ թվում նաև Այուբ Բորչաշվլիին, ով համարվում է Պանկիսի կիրճում ԻՊ-ի գործակալը: Պանիկիսի կիրճը հիմնականում բնակեցված է մուսուլման կիստերով:
Հիշեցնենք, որ Սիրիայում ռազմական գործողությունների ամբողջ ընթացքում սպանվել է Վրաստանի արդեն 23 քաղաքացի: «Իսլամական Պետության» շարքերում կռվող Վրաստանի քաղաքացիների քանակի մասին կոնկրետ տեղեկություններ հայտնի չեն: