Ադանայում տեղակայված Թուրքիայի ԶՈւ զորամասերից մեկից 4 միավոր Տ-155 «Ֆըրթընա» ինքնագնաց հրետանային համակարգ է ուղարկվել թուրք-սիրիական սահման: Այս մասին հայտնում է թուրքական «Իհլաս» գործակալությունը:
Հաուբիցները տեղակայվում են Թուրքիայի հարավային Շանլըուրֆա նահանգում: Հենց նշված տարածքից է թուրքական զինուժը 2016 թ. օգոստոսի 24-ից ներխուժել Սիրիայի տարածք և շարունակում է առաջխաղացումը: Տ-155 հաուբիցները օգտագործվում են Սիրիայի տարածքում տարբեր խմբավորումների, այդ թվում՝ քրդական զորամիավորումների դիրքերին հարվածելու համար:
Հավելենք, որ վերջին շրջանում թուրքական զինուժը ոչ միայն մոտեցել է Սիրիայի Ալ-Բաբ քաղաքին, այլև հայտարարում է առավել հեռահար նպատակների մասին: Մասնավորապես խոսքը քրդերի վարհսկողության տակ գտնվող Մանմբիջ քաղաքը գրավելու, Հալեպի նկատմամբ որոշակի վերահսկողություն հաստատելու մասին է: Սակայն այս հարցում Թուրքիան պարտավոր է հաշվի նստել տարածաշրջանային հիմնական դերակատարների հետ:
Մասնավորապես, երբ նոյեմբերի կեսերին Սիրիայի բանակը զարգացրեց առաջխաղացումը Հալեպի հյուսիսարևելյան շրջաններում, և արդեն նոյեմբերի վերջին վերահսկողություն հաստատեց արևելյան Հալեպի մեծ մասի վրա՝ Թուրքիայի նախագահը Սիրիայի ռազմական գործողություններ սկսելուց հետո առաջին անգամ բացահայտ հայտարարեց, որ իրենց հիմնական խնդիրը Ասադի իշխանությունը տապալելն է:
Ինչ վերաբերում է քրդերի դեմ պայքարին, ապա Թուրքիան մշտապես հայտարարել է,ո ր իրենց նպատակներից մեկը «անվտանգության գոտի» ստեղծելն է: Սա ուղղված է նրան, որպեսզի Սիրիայի երկու տարբեր մասերում տեղակայված քրադական ուժերը չմիավորվեն: Դա իր հերթին կարող էր տանել Թուրքիայի սահմանին քրադական նոր կազմավորման ստեղծմանը:
Այս գործընթացների մասին առավել մանրամասն՝ հետևյալ հոդվածներում:
Pingback: Թուրքիան տանկեր է ուղարկել Հալեպից հյուսիս Ալ-Բաբի շրջան | Ռազմ.info
Pingback: Ռազմաշաբաթ. Տարածաշրջան. 4 դեկտեմբեր – 10 դեկտեմբերի, 2016 | Ռազմ.info