ՌԴ առաջարկում է Կասպից ծովում ստեղծել միասնական նավիգացիոն դաշտ

Օրերս ՌԴ ՊՆ՝ Նավիգացիոն և օվկիանոսագրության վարչության պետ Ալեքսանդր Շեմետովը հայտարարել է, որ Կասպից ծովում մինչ օրս կարգավորված չեն սահմանային հարցերը, իսկ առափնյա պետություններից յուրաքանչյուրի նավատորմն օգտագործում է սեփական, հաճախ բավական հին տվյալները, չի իրականացվում տվյալների փոխանակում նավիգացիոն դրության փոփոխությունների վերաբերյալ:
Շեմետովի խոսքով՝ Կասպից ծովի առափնյա երկրները կարող են ապահովել իրենց նավարկությունների անվտանգությունը միայն ջրային տարածքի ուսումնասիրման գործում համագործակցության և նավիգացիոն տվյալների օպերատիվ փոխանակման դեպքում: ՌԴ-ն պատրաստ է ստանձնել այդ գործում կոորդինոտորի դերը:
«Մեր խնդիրն է ապահովել բոլորիս անհրաժեշտ ջրային տարածքի խորը ուսումնասիրումը»,- ասել է ՌԴ ՊՆ ներկայացուցիչը:
Շեմետովը նշել է, որ ներկայումս կոնկրետ առաջարկներ են մշակվում Կասպից ծովում ՌԴ ԱԳՆ հետ համատեղ միասնական նավիգացիոն տարածքի ստեղծման, քարտեզագրության տարածքների սահմանազատման, նավիգացիոն սպառնալիքների վերաբերյալ տվյալների փոխանակման գործընթացի և այդ տեղեկությունները նավավարներին ճիշտ ժամանակին հասցնելու ուղղությամբ:
Հաղորդվում է, որ ջրագրական ծառայությունների պետերի գիտաժողովը կկայանա մինչ Կասպից ծովում նավագնացությունների հաջորդ շրջանի սկիզբը:
Նշենք, որ Կասպից ծովում սահմանային հարցերի չկարգավորվածության պատճառով ժամանակ առ ժամաանկ խնդիրներ են ծագում Ադրբեջանի և Թուրքմենստանի, ինչպես նաև Ադրբեջանի և Իրանի միջև: Մասնավորապես հուլիսի 24-ին Կասպից ծովի վիճելի նավթագազային Սերդար (ադրբ. Քյափազ) հանքավայրի տարածքում ադրբեջանցի սահմանապահները թուրքմենական ձկնորսական նավ էին ձերբակալել։ Դրանից մոտ մեկ ամիս առաջ նույն տարածքում ադրբեջանցի սահմանապահները թույլ չէին տվել թուրքմեն գիտնականներին սեյսմիկ հետազոտություններ կատարել։
Հավելենք, որ որ ադրբեջանա-թուրքմենական սահմանային վեճը Կասպից ծովի երեք խոշոր նավթագազային հանքավայրերի շուրջ է Սերդար (ադրբ. Քյափազ), Օսման (ադրբ. Ազերի) և Օմար (ադրբ. Չիրաղ), որոնցից վերջին երկուսն Ադրբեջանը շահագործում է դեռ 1994 թվականից։
ԻՆչ վերաբերում է Կասպից ծովի շուրջ Իրան-Ադրբեջան տարաձայնություններին, ապա նախկինում սահմանային միջադեպեր են գրանցվել նաև Իրանի և Ադրբեջնաի միջև, որից հետո կողմերը փոխադարձ մեղադրանքներ էին հնչեցրել սահմանի խախտման մասին: Իսկ օգոստոսին Իրանը հայտնել էր Ադրբեջանի կողմից սեփական նավթահորերից արտաթորվող նավթով Կասպից ծովի ափերը աղտոտելու պատճառով Ադրբեջանի դեմ բողոքի հայց ներկայացնելու մտադրության մասին:
Աղբյուրներ՝ http://ria.ru/defense_safety/20121101/908504695.html
http://razm.info/7194#more-7194
http://armenian.irib.ir/news/iran/item/17791-%D8%A7%DB%8C%D8%B1%D8%A7%D9%86-%D8%A7%D8%B2-%D8%AC%D9%85%D9%87%D9%88%D8%B1%DB%8C-%D8%A2%D8%B0%D8%B1%D8%A8%D8%A7%DB%8C%D8%AC%D8%A7%D9%86-%D8%A8%D9%87-%D8%B9%D9%84%D8%AA-%D8%A2%D9%84%D9%88%D8%AF%DA%AF%DB%8C-%D9%86%D9%81%D8%AA%DB%8C-%D8%AF%D8%B1%DB%8C%D8%A7%DB%8C-%D8%AE%D8%B2%D8%B1-%D8%B4%DA%A9%D8%A7%DB%8C%D8%AA-%D9%85%DB%8C-%DA%A9%D9%86%D8%AF