Պաշտպանության բանակի կենտրոնական ենթակայության զորամասերից մեկը ներգրավվել է վաշտային ցուցադրական մարտավարական զորավարժության, որն անցկացվել է «Տիգրանակակերտ» զորավարժարանում: Այս մասին հայտնի է դարձել ՊԲ «Գոյամարտ» հաղորդաշարի նոյեմբերի 26-ի թողարկումից։
Զորավարժությունն ուղեկցվել է մարտական հրաձգությամբ, դրա սցենարով պայմանականորեն «վերականգնվել է առաջնային եզրը»։
«Տիգրանակակերտ» զորավարժարանում ՊԲ զորամասերից մեկը անցկացրել է վաշտային ցուցադրական մարտավարական զորախաղեր
Զորավարժության մեկնարկից սկսած՝ ուժեղացված հրաձգային ստորաբաժանումներից մեկը կատարել է ռազմերթ և հակառակորդի հետ անմիջական շփման պայմաններում անցել է պաշտպանության։ Այնուհետև հակառակորդի հանդեպ առավելության հասնելով՝ վերականգնել է առաջնային եզրը։
Զորավարժությունը կազմակերպվել է մասնակիցների իրական մարտական խնդիրների և հավանական գործողությունների հաշվառումով։ Փորձի փոխանակման նպատակով հրավիրվել են զորամասի գումարտակների և վաշտերի հրամկազմը։
Զորամասի շտաբի պետ Գոռ Իշխանյանի խոսքով՝ զորավարժության նպատակն է եղել դասակի, վաշտի հրամանատարական կազմին ուսուցանել առավել փոքր խմբերով ավելի մեծ խնդիրներ կատարելը, տեղանքի առանձնահատկությունները օգտագործելով՝ ինքնուրույն որոշումներ կայացնելը և դրանք իրագործելը։
