Թուրքիայի ԶՈւ ԳՇ պետն այցելել է Իրաքի հետ սահմանային ստորաբաժանումներ

Նոյեմբերի 10-ին Թուրքիայի ԶՈւ ԳՇ պետ, բանակի գեներալ Հուլուսի Աքարն այցելել է Շրնաք նահանգ, ստուգայցեր կատարել Իրաքի հետ սահմանին տեղակայված ստորաբաժանումներ: Այս մասին հայտնում է թուրքական «Դողան» գործակալության կայքը:

Գեներալ Աքարին ուղեկցել են Թուրքիայի ԶՈւ ցամաքային, ռազմածովային, ռազմաօդային ուժերի, զորամիավորումների հրամանատարները:

Հիշեցնենք, որ թուրքական զինուժի ղեկավարությունը նույն կազմով նոյեմբերի 7-ին այցելել էր Սիրիայի հետ սահմանին տեղակայված ստորաբաժանումներ:

Նշենք, որ թուրքական զինուժը ներկայումս գործողություններ է վարում Իրաքի և Սիրիայի տարածքում՝ Սիրիայում ունենալով առավել մեծ թվով զինուժ: Սակայն վերջին շրջանում տանկեր, այլ զրահատեխնիկա և հավելյալ զինանձնակազմ է տեղակայվում նաև Իրաքի հետ սահմանին:

Թուրքիան փորձում է մասնակցել ինչպես Իրաքի Մոսուլ քաղաքը, այնպես էլ՝ Սիրիայի Ռաքքա քաղաքը «Իսլամական պետություն» ահաբեկչական խմբավորումից ազատագրելու գործողություններին՝ ջանալով մեծացնել իր ազդեցությունն այդ երկրներում: Սակայն ներկայումս Թուրքիայի նման նկրտումները լուրջ հակասություններ են առաջացրել նշված երկրների իշխանությունների հետ:

Մասնավորապես Իրաքի պարագայում Թուրքիան փորձում է այդ երկրի հյուսիսային շրջաններում իրեն հավատարիմ սուննիների ազդեցությունը մեծացնել, ինչպես նաև սահմանափակել շիաների ազդեցությունը: Հակառակ դեպքում թուրքական կողմը սպառնում է ավելի մեծ թվով զինուժ մտցնել Իրաքի տարածք:

One response to “Թուրքիայի ԶՈւ ԳՇ պետն այցելել է Իրաքի հետ սահմանային ստորաբաժանումներ

  1. Pingback: Թուրքիայի ԶՈւ հրամանատարությունը այցելել է սահմանային ստորաբաժանումներ | Ռազմ.info

Մեկնաբանել

Ձեր էլ. փոստի հասցեն չի հրատարակվելու: Պարտադիր դաշտերը նշված են *