Պաշտպանության նախարարը հանդիպել է ԱՄՆ ռազմածովային ուժերի քարտուղար Ռեյ Մաբուսի հետ

Ինչպես տեղեկացնում են պաշտպանության նախարարությունից, այսօր՝ հոկտեմբերի 29-ին, ՀՀ ՊՆ վարչական համալիրում պաշտպանության նախարար Սեյրան Օհանյանը հանդիպել է ԱՄՆ ռազմածովային ուժերի քարտուղար Ռեյ Մաբուսի հետ, ով հոկտեմբերի 28-ից գտնվում է Հայաստանում: Արարողակարգային նիստից հետո պաշտպանության նախարարն ու ԱՄՆ ռազմածովային ուժերի քարտուղարը մասնակցել են համատեղ բրիֆինգի:
Կողմերը կարևորել են ռազմական ոլորտում հայ-ամերիկյան համագործակցության դինամիկ զարգացումը՝ ընդգծելով հատկապես երկկողմ համագործակցության շրջանակներում կայացած բարձրաստիճան փոխայցելություններն և խորհրդատվությունները:
«Ինչ վերաբերում է տվյալ այցին, ապա սա վկայում է այն մասին, որ ՀՀ և ԱՄՆ հարաբերությունները դրվում են բարձր մակարդակի վրա և դինամիկ զարգացման միտում ունեն: Համատեղ աշխատանքերը կշարունակվեն նաև 2013-ին»,- ասել է ՀՀ պաշտպանական գերատեսչության ղեկավար Սեյրան Օհանյանն ու հավելել, որ ռազմական ոլորտում համագործակցությունը պայմանականորեն բաժանվում է երկու ուղղությունների, առաջինը խաղաղապահ կարողությունների զարգացումն է, որը բացի խաղաղապահ գործողություններից, ենթադրում է նաև համագործակցության խորացում ռազմաբժշկական ոլորտում, ինչպես նաև հումանիտար ականազերծման խնդիրների իրականացում: Երկրորդ ուղղությունը պաշտպանական բարեփոխումներն են՝ հատկապես ռազմկրթական ոլորտում վերապատրաստման խնդիրների իրականացման, կրտսեր սպայական կազմի պատրաստության, արհեստավարժ սերժանտական համակարգի ձևավորման և մարդկային ռեսուրսների կառավարման համակարգի կատարելագործման ուղղությամբ:
Ռեյ Մաբուսը նշել է, որ ԱՄՆ Ծովահետևակային կորպուսը 2012 թվականին Սևծովյան ռոտացիոն շրջանում ՀՀ զինված ուժերին ևս ներգրավել է վարժանքներում: