Իրանի ռազմածովային ուժերի հրամանատար, դերծովակալ Հաբիբոլա Սայարին հայտարարել է , որ մինչև տարեվերջ (իրանական օրացույցով 2017թ. մարտի 21) Իրանի ռազմածովային ուժերը անցկացնելու են շուրջ 25 զորավարժություն, որոնց մի մասն արդեն անցկացվել է ընթացիկ տարում (2016թ. մարտի 21-ից):
Այս մասին նոյեմբերի 7-ին հայտնում է իրանական «Թասնիմ» լրատվական գործակալությունը:
Իրանի ռազմածովային ուժերի զորավարժություն Հորմուզի նեղուցում (արխիվ)
Նշենք, որ բացի այդ 2017թ. Իրանն անցկացնելու է խոշորամաստաբ «Վելայեթ-95» զորավարժությունը: Իսկ դրա նախորդ` «Վելայեթ-94» զորավարժությունը անցկացվել է տարեսկզբին:
Վարժանքներն անցկացվել են Իրանի հարավ-արևելքում գտնվող Մեքրանի ափերում և Հնդկական օվկիանոսում: Զորավարժության ընթացքում երկրի ափերը պաշտպանելու մեխանիզմները փորձարկելու նպատակով, ըստ նախապես մշակված սցենարի` Իրանի ՌԾՈւ-ն հրետանու կրակով, «Շահաբ», «Ռաադ» և «Աշուրա» դասի ռազմանավերով, բանակի հետախուզադիվերսիոն ուժերով կասեցրել է հակառակորդի ռազմանավերի առաջխաղացումը:
Զորավարժությանը ներգրավվել են նաև անօդաչու թռչող սարքեր: Այն ընդգրկել է ավելի քան 3 մլն քառակուսի կմ տարածք` Օմանի և Պարսից ծոցերի տարածքում` ներառյալ Հորմուզի նեղուցը:
Նշենք նաև, որ ընթացիկ տարում Իրանի ՌԾՈւ-ն զորավարժություններ է անցկացրել նաև Օմանի, Իտալիայի, Պակիստանի, Ադրբեջանի ռազմածովային ուժերի հետ: