Թուրքիան տանկեր և այլ զինտեխնիկա է կուտակում Իրաքի հետ սահմանին

Նոյեմբերի 1-ին Թուրքիան զինված ուժերի ցամաքային զորքերի 28-րդ մեխանիզացված հետևակային բրիգադից տանկեր և այլ զրահատեխնիկա է տեղափոխել երկրի հարավ-արևելյան Շրնաք նահանգի Սիլոփի գավառ՝ Իրաքի հետ սահմանին: Այս մասին հայտնում է թուրքական պետական «Անադոլու» գործակալությունը

Թուրքիան տանկեր և այլ զինտեխնիկա է ուղարկել Իրաքի հետ սահման:

Համաձայն աղբյուրի՝ Անկարայից տանկեր և տանկերի քարշակներ, իսկ Չանքըրըից զրահափոխադրիչներ և այլ տեխնիկա է ուղարկվել Սիլոփի գավառ:

Թուրքիայի պաշտպանության նախարար Ֆիքրի Ըշըքը, անդրադառնալով այս հարցին, հայտարարել է, որ երկրի սահմանին ընթացող զարգացումների համատեքստում Թուրքիան պետք է պատրաստ լինի ցանկացած իրավիճակի:

«Այժմ մի կողմից Թուրքիան երկրի ներսում է պայքարում ահաբեկչության դեմ, մյուս կողմից էլ երկրի սահմաններից այն կողմ կարևոր զարգացումներ են տեղի ունենում: Հետևաբար բոլոր այդ զարգացումներին Թուրքիան պետք է պատրաստ լինի և զինտեխնիկայի տեղափոխումը սահմանին այդ պատրաստությունների մի մասն է»,-ասել է Ըշըքը:

Նույն օրը՝ Իրաքի վարչապետ Հայդար Ալ-Աբադին հայտարարել է հեռուստատեսությամբ, որ Իրաքը չի ցանկանում պատերազմել Թուրքիայի հետ:

«Մենք Թուրքիայի հետ պատերազմ և առճակատում չենք ուզում, բայց եթե առճակատում լինի, մենք պատրաստ ենք դրան: Մենք Թուրքիային կհայտարարենք թշնամի և կվարվենք ինչպես թշնամու հետ»,-ասել է Աբադին:

Նշենք, որ մինույն ժամանակ, մի քանի օր է, ինչ Իրաքի կառավարական բանակի կողմից «Իսլամական պետություն» ահաբեկչական խմբավորման դեմ կռվող և հիմնականում շիաներից, եզդիներից և քրիստոնյաներից կազմված՝ «Ժողովրդական զորահավաքի ուժեր» (արաբ. Հաշդ ալ-շաաբի) ջոկատները  ռազմական գործողություններ են սկսել Իրաքի հյուսիսային Թալ-Աֆար քաղաքը ԻՊ զինյլալներից ազատագրելու համար և արդեն վերցրել են քաղաքին մոտ գտնվող մի քանի գյուղեր և բնակավայրեր:

#BREAKING ” #Iraqi #PMU nearing #Tal_Afar held by #ISIS as dozens of villages are liberated everyday throughout the western front of #Mosul pic.twitter.com/dPxXbHEoj5

— Iraqi PMU English (@pmu_english) November 1, 2016

Այդ զարգացումներից հետո, հոկտեմբերի 29-ին Թուրքիայի նախագահ Ռեջեփ Թայիփ Էրդողանը հայտարարել է, որ եթե Հաշդ ալ-շաաբիի ջոկատները մտնեն Թալ-Աֆար, Թուրքիան դիմելու է համապատասխան գործողությունների և դիտորդի կարգավիճակում չի մնալու, ինչը ըստ երևույթին պայմանավորված է Իրաքի սուննի թուրքմենների գործոնով:

«Թալ-Աֆարը գլխավորապես Սիրիայի թուրքմեններով բնակեցված քաղաք է, մի մասը շիա, մյուս մասը՝ սունի: Մենք մարդկանց չենք դատում կրոնով, բայց եթե Հաշդ ալ շաաբիի ջոկատները մտնեն այդ քաղաք, մեր պատասխանը ուրիշ է լինելու»,-ասել է Էրդողանը:

Նշենք, որ այն բանից հետո, երբ հոկտեմբերի 1-ին Թուրքիայի խորհրդարանը 1 տարով (մինչև 2017 թ.հոկտեմբերի 30) երկարաձգեց  երկրի զինված ուժերի՝ Իրաքում և Սիրիայում ռազմական գործողություններ իրականացնելու վերաբերյալ մանդատը՝  Իրաքի խորհրդարանը ընդունեց Թուրքիայի այդ որոշումը դատապարտող բանաձև:

Իրաքի վարչապետ Հայդար Ալ-Աբադին զգուշացրեց Թուրքիային, որ եթե այդ երկրի իշխանությունները թուրքական զորքերը դուրս չբերեն Հյուսիսային Իրաքի տարածքից, դա կարող է հանգեցնել տարածաշրջանային պատերազմի:

Հոկտեմբերի 6-ին, սակայն,  Թուրքիայի վարչապետ Բինալի Յըլդըրըմը հայտարարեց, որ թուրքական զորքերը շարունակելու են մնալ Հյուսիսային Իրաքում, ավելի կոնկրետ՝ Մոսուլի մոտ գտնվող  Բեշիքայի շրջանում: