Սիրիական բանակը առաջին անգամ հարվածել է Սիրիայի թուրքմեն զինյալներին

Երեկ՝ հոկտեմբերի 25-ին, Սիրիայի կառավարական զորքերի ուղղաթիռը հարվածել է  Հալեպից հյուսիս ընկած Էլ-Բաբ բնակավայր շարժվող, թուրքական զինուժի աջակցությամբ գործող տեղացի թուրքմեններին։ Սպանվել է 3 թուրքմեն, վիրավորվել՝ 13-ը։ Այս մասին հայտնում է թուրքական Haber Turk պարբերականը` հղում անելով Թուրքիայի ԶՈւ գլխավոր շտաբին։

Սիրիայում Թուրքիայի աջակցությամբ գործող «թուրքմեն զինյալները»

«Եփրատի վահան» գործողության մեկնարկից Սիրիայի կառավարական բանակը առաջին անգամ է հարվածում թուրքմեններին («Սիրիայի ազատ բանակ»)։

ԶՈւ ԳՇ հայտարարության մեջ նշված է, որ թուրքմենները 4 կմ հեռավորության վրա են Հալեպի հյուսիս–արևելյան հատվածից։

Ըստ գլխավոր շտաբի՝ «Եփրատի վահան» գործողության ընթացքում «ազատագրվել է» 163 բնակավայր, իրենց վերահսկողության տակ է 1300 քկմ տարածք։

Իսկ այսօր՝ հոկտեմբերի 26-ին, ինչպես հայտնում է Թուրքիայի պետական «Անադոլու» գործակալությունը, թուրքերը Ֆըրթընա հաուբիցով ոչնչացրել են ԻՊ 99 և «Ժողովրդավարական միություն» կուսակցությունը (PYD) 18 թիրախ։

Հոկտեմբերի 20-ին Սիրիայի բանակի բարձրագույն հրամանատարությունը սպառնացել էր խոցել Թուրքիայի  ՌՕՈւ  ինքնաթիռները Սիրիայի օդային տարածքը նորից խախտելու դեպքում։ Նույն օրը թուրքական օդուժը ռմբակոծել էր Հալեպի հյուսիսում տեղակայված մի շարք բնակավայրեր: Հարվածներից զոհվել էր մոտ 150 խաղաղ բնակիչ։

Հիշեցնենք նաև, որ 2016-ի օգոստոսի 24-ից թուրքական զինուժը ներխուժել է Սիրիայի ցամաքային տարածք՝ հայտարարելով ԻՊ դեմ «Եփրատի վահան» ռազմական գործողությունը իրականացնելու և իր սահմանը գրոհայիններից «մաքրելու» մասին:

Սեպտեմբերի 16-ին Թուրքիայի զինուժը սկսել էր Սիրիայի թուրքմենների օգնությամբ Էլ–Բաբ բնակավայրը «Իսլամական պետություն» ահաբեկչական խմբավորման գրոհայիններից «մաքրելու» գործողությունը։