Ռուսաստանի և Սիրիայի զինված ուժերը վերջին 7 օրերի ընթացքում ավիահարվածներ չեն հասցրել Հալեպին: Այս մասին ռուսաստանյան «ՏԱՍՍ» լրատվական գործակալությանը հայտնել է ՌԴ պաշտպանության նախարարության պաշտոնական ներկայացուցիչ Իգոր Կոնաշենկոն:
Հալեպում ավիահարվածների դադարեցման մասին Ռուսաստանը հայատարարել էր հոկտեմբերի 18-ին, ինչը պայմանավորված էր հոկտեմբերի 20-ին հաստատվելիք հումանիտար դադարով, որի ընթացքում խաղաղ բնակիչները և զինյալները պետք է լքեին քաղաքը։
Տարհանման համար գործարկվում էր հատուկ միջանցքներ. վեցը՝ խաղաղ բնակչության, ևս երկուսը՝ քաղաքի արևելյան մասում՝ զինյալների համար։
Չնայած հումանիտար դադարին` ահաբեկիչները պարբերաբար խոչընդոտում էին մարդասիրական աշխատանքները, գնդակոծում խաղաղ բնակիչների տարհանման համար նախատեսված միջանցքները, սպառնում բնակչությանը, որ նրանք չօգտվեն հումանիտար միջանցքներից և դուրս չգան քաղաքից։
Հումանիտար դադարը տևում է մինչև հոկտեմբերի 22-ը, սակայն ըստ Կոնաշենկոյի` քաղաքը լքող խաղաղ բնակչության համար շարունակում են գործել 6 հումանիտար միջանցքները, ստեղծվել են նաև առաջին բուժօգնության և սննդի տրամադրման կետեր:
Ավելի վաղ Հալեպի արևելյան շրջաններից, որ գտնվում է ահաբեկիչների հսկողության տակ, հումանիտար միջանցքներով 48 սիրիացի է դուրս բերվել: