Այսօր` հոկտեմբերի 19-ին, ՄԱԿ-ի միջնորդությամբ 72 ժամանոց հրադադար է հաստատվելու Եմենում: Այս մասին հայտարարել է Եմենի հարցերով ՄԱԿ-ի հանձնակատար Իսմայիլ Ուլդ Շեյխ Ահմեդը: Փոխանցում է Reuters գործակալությունը:
Հանձնակատարի խոսքերով` նա ստացել է հակամարտող կողմերի համաձայնությունը՝ 2016թ. ապրիլի 10-ին հաստատված հրադադարի պայմաններով կրկին հրադադար հաստատելու վերաբերյալ:
Հրադադարը հաստատվելու է Եմենի ժամանակով գիշերվա 23:59-ին (Երևանի ժամանակով հոկտեմբերի 20-ին` ժամը 00:59). սկզբում 72 ժամ, այնուհետև, եթե կողմերը պահպանեն հրադադարի ռեժիմը, այն կերկարաձգվի:
Հութի զինյալներ՝ Սանայում
Կողմերը պարտավորվում են լիովին դադարեցնել ռազմական գործողությունները և թույլ տալ, որ մարդասիրական օգնությունը տեղ հասնի հութիների շրջապատման տակ գտնվող Եմենի երրորդ խոշոր քաղաք Թաիզի:
Ավելի վաղ` հոկտեմբերի 17-ին, Եմենի արտգործնախարար Աբդ էլ Մալեք ալ Մեխլաֆին հայտարարել էր, որ Եմենի նախագահ Աբդ Ռաբբու Մանսուր Հադին համաձայնել է 72 ժամով հրադադար հաստատել, եթե հութիները ևս հավատարիմ մնան դրան: Ավելի վաղ Եմենում հրադադար հաստատելու կոչերով հանդես էին եկել ԱՄՆ-ն, Մեծ Բրիտանիան, Սաուդյան Արաբիան և ՄԱԿ-ը:
Ռուսաստանյան «Ռիա Նովոստի» լրատվական գործակալության փոխանցմամբ`ԱՄՆ պետքարտուղար Ջոն Քերին Լոնդոնում Սիրիայի հարցերով ԱՄՆ և եվրոպական երկրների հանդիպման ժամանակ հայտարարել է, որ նախևառաջ անհրաժեշտ է Եմենում հրադադար հաստատել առանց որևէ պայմանի, հետո` սկսել բանակցությունները:
Եմենում հրադադար հաստատելու փորձեր եղել են նաև 2015թ մայիսին ,հուլիսին , 2016թ. ապրիլին, որոնք, սակայն ձախողվել են:
Եմենում պատերազմ սկսվել է 2014 թվականից. հակամարտող կողմերն են` մի կողմից շիա հութիները, մյուս կողմից երկրի սուննի նախագահ Աբդ-Ռաբբա Մանսուրա Հադիին աջակցող ուժերը:
2015 թ. փետրվարին հութիներին հաջողվում է նախագահ Հադիին հեռացնել իշխանությունից: Վերջինս ապաստանում է սկզբում երկրի հարավում՝ Ադեն քաղաքում, իսկ օրեր անց, երբ հութիներին հաջողվում է գրավել նաև այդ քաղաքը, Հադին լքում է երկիրն ու հաստատվում հարևան Սաուդյան Արաբիայի մայրաքաղաք Ռիադում։
Այնուհետև Եմենի կառավարությունը օգնության խնդրանքով դիմում է արաբական երկրներին, ինչից հետո Սաուդյան Արաբիայի գլխավորությամբ Պարսից ծոցի արաբական 9 երկրներ ստեղծում են դաշինք ընդդեմ հութինների (կազմում են Պարսից ծոցի բոլոր արաբական երկրները՝ բացառությամբ Օմանի) և ռազմական գործողություններ են սկսում Եմենում։
Հետագայում կռիվը տեղափոխվում է նաև Սաուդյան Արաբիայի և Եմենի ցամաքային սահման, որտեղ, ինչպես և առհասարակ Եմենի մյուս տարածքներում, կողմերը փոփոխական հաջողություններով կռվում են մինչ օրս: