Երեկ` հոկտեմբերի 18-ին, Եգիպտոսի Էլ Ումաեդ ռազմաբազայում Ռուսաստանի և Եգիպտոսի դեսանտայինները «Բարեկամության պաշտպաններ-2016» զորավարժության շրջանակներում առաջին համատեղ վարժանքներն են անցկացրել: Այս մասին հայտնում է ՌԴ ՊՆ պաշտոնական կայքը:
Վարժանքների ընթացքում եգիպտոսցի զինծառայողները ցույց են տվել քաղաքում և անապատային տարածքներում մարտ վարելու իրենց ունակությունները, մշակվել են դեսանտայինների գործողությունները բնակելի տարածքների գրավման ժամանակ:
«Բարեկամության պաշտպաններ-2016» զորավարժությանը ներգրավված են 500-ից ավելի զինծառայող, 15-ից ավելի տարբեր նշանակության ուղղաթիռներ և ինքնաթիռներ, 10 միավոր մարտական տեխնիկա դեսանտավորման համար:
Հավելենք նաև, որ զորավարժության ընթացքում ՌԴ ռազմադեսանտային ուժերը մարտական մեքենաները դեսանտավորելու են Իլ-76 ինքնաթիռից, իսկ եգիպտացի զինծառայողները դեսանտավորելու են C-130 ինքնաթիռներից:
Զորավարժությունը տևելու է մինչև հոկտեմբերի 26-ը:
Նշենք նաև, որ միաժամանակ Ռուսաստանը բանակցություններ է վարում Եգիպտոսի հետ`այնտեղ ռազմական օբյեկտներ վարձակալելու շուրջ: Խոսքը մասնավորապես եգիպտական Սիդի-Բարրանի քաղաքում տեղակայված խորհրդային բազան վերականգնելու մասին է: Այս մասին, իր աղբյուրներին հղումով, հայտնում է ռուսաստանյան «Իզվեստիյա» լրատվակայքը: Կողմերի փոխհամաձայնության գալու դեպքում` ռազմաբազան կսկի գործել 2019 թվականից:
Հիշեցնենք, որ Ռուսաստանը ավիաբազա ունի Սիրիայում . «Հմեյմիմ» օդանավակայանում տեղակայված են ՌԴ ռազմաօդային ուժերի ինքնաթիռները: Չնայած դրան` Ռուսաստանը մտադիր է Սիրիայի Տարտուս քաղաքի նավահանգստում հիմնել նաև ռազմածովային բազա:
Pingback: Եգիպտոսում Ռուսաստանի հետ զորավարժությանը մարտական մեքենաներ են դեսանտավորվել | Ռազմ.info