Բրազիլական GESPI Defense Systems մասնավոր ընկերությունը բանակցում է արտասահամանյան մի շարք երկրների, այդ թվում՝ Ադրբեջանին սեփական արտադրության միջին հեռահարության 84 մմ տրամաչափի մեկանգամյա օգտագործման ALAC դյուրակիր հակատանկային նռնականետներ վաճառելու համար:
Այս մասին հայտնում է «Ջեյնս» ռազմական հանդեսը՝ փոխանցելով հակատանկային նռնականետների արտադրությամբ զբաղվող բրազիլական ընկերության խոսնակից ստացած տեղեկությունը:
Բրազիլական արտադրության միջին հեռահարության 84 մմ տրամաչափի միանգամյա օգտագործման ALAC դյուրակիր հակատանկային նռնականետ
Բրազիլական ընկերության խոսնակը հայտնել է, որ ներկայումս Ադրբեջանը բանակցում է 50 միավոր նման համակարգեր գնելու համար՝ հետագայում նպատակ ունենալով իր տարածքում սկսել դրանց համատեղ արտադրությունը: Բացի այդ, բրազիլական ընկերությունը բանակցում է նաև Մեքսիկային 1200 միավոր և Իրաքին 2000 միավոր նման նռնականետներ վաճառելու համար: Սակայն ներկայումս նախնական բանակցություններ են վարվում նաև Պորտուգալիային և Ինդոնեզիային նման համալիրներ վաճառելու համար:
Նշենք, որ դեռևս 2015-ի փետրվարին Ադրբեջանի պաշտպանական արդյունաբերության նախարար Յավեր Ջամալովը հայտարարել էր Բրազիլիայի հետ հակատանկային նռնականետների համատեղ արտադրություն սկսելու բանակցությունների մասին:
ALAC հակատանկային նռնականետ.
- Շվեդական արտադրության 84 մմ տրամաչափի Saab AT4 նռնականետի բրազիլական կրկնօրինակ:
- Զանգվածը՝ 7,5 կգ
- Մարտագլխիկը՝ 2,4 կգ կումուլյատիվ մարտական մասով ռեակտիվ նռնակ
- Կարող է խոցել մինչև 300 մմ հաստությամբ միաձույլ զրահ
- Կրակի արդյունավետ հեռավորությունը՝ մինչև 300 մ
Բրազիլական արտադրության միջին հեռահարության 84 մմ տրամաչափի միանգամյա օգտագործման ALAC դյուրակիր հակատանկային նռնականետ