Հայտնի է դարձել սեպտեմբերի 27-ին փորձարկման ժամանակ վթարի ենթարկված թուրքական ANKA T001 անօդաչու թռչող սարքի (ԱԹՍ) կործանման պատճառը: Հիշեցնենք, որ սարքը թռիչքի ժամանակ 3300 մետր բարձրությունից վայր էր ընկել:
«Թուրքիայի օդա-տիեզերային արդյունաբերություն» ընկերությունը (Turkish Aerospace Industries) հայտարարել էր, որ վթարի պատճառը մեխանիկական է, և հետազոտություներ էր կատարվում մանրամասները հայտնաբերելու համար:
Համաձայն թուրքական Zaman.com կայքի՝ վերջապես պարզվել է, որ սարքը մոտ 20 վայրկյանով կորցրել է կապը երկրից կառավարման համակարգի հետ, որից հետո ինքնաթիռի համակարգիչը ավտոմատ կերպով ինքնաոչնչացման հրահանգ է տվել, ինչը և դարձել է վթարի պատճառը: Ինքնաոչնչացման ռեժիմը միանում է այն դեպքում, երբ առաջանում է սարքի՝ հակառակորդի ձեռքն ընկնելու ռիսկ։
ANKA-ի առաջին փորձարկումը տևել է 14 րոպե, որից հետո այն վթարային վայրեջք է կատարել: Ըստ իսրայելական «Առուց Շեվա» ռադիոկայանի կայքի՝ երկրորդ և երրորդ փորձարկումները նույնպես ավարտվել են անհաջողությամբ: Այնուամենայնիվ հաշվի առնելով թուրք-իսրայելական հարաբերություների ներկա վիճակը, անհրաժեշտ է զգույշ վերաբերվել իսրայելական աղբյուրների հայտարարություններին Թուրքիայի վերաբերյալ:
Ապագայում Թուրքիան նախատեսում է հզոր և չափսերով ավելի մեծ ANKA +A ԱԹՍ-երի ստեղծումը, որոնք պլանավորում է զինել նաև հրթիռներով: