Թուրքիան շարունակում է Սիրիայի սահմանով «անվտանգության պատի» շինարարական աշխատանքները, արդեն կառուցված է պատի 200 կմ-ը, նախատեսվում է ավելացնել ևս 700 կմ: Այս մասին հայտնում է թուրքական Milliyet պարբերականի կայքը:
Ըստ պարբերականի՝ պատի շինարարական աշխատանքները նախատեսվում է ավարտել 5 ամսում: Այն բաղկացած է լինելու 7 տոննա կշռող 2 մ երկարությամբ և 3 մ բարձրությամբ բետոնե բլոկներից: Պատի կառուցումը Թուրքիայի համար կարժենա մոտ 670 մլն ամերիկյան դոլար (2 մլրդ թուրքական լիրա):
Նախատեսվում է պատը կառուցել թուրք-սիրիական 911 կմ երկարությամբ սահմանի երկայնքով: Այս պահին ավարտված են պատի՝ Թուրքիայի Հաթայ և Շանլըուրֆայ նահանգներով ձգվող մասերը:
Հավելենք, որ պատի աշխատանքները սկսվել են դեռևս 2012 թվականից: Պաշտոնական Անկարան այն ժամանակ պատի կառուցումը պատճառաբանել էր սահմանը խախտելու հաճախացած դեպքերի դեմ պայքարելու անհրաժեշտությամբ:
Հիշեցնենք, որ 2016-ի օգոստոսի 24-ի առավոտյան Թուրքիայի ԶՈւ հատուկ նշանակության, տանկային ստորաբաժանումները օդուժի աջակցությամբ ցամաքային գործողություններ էին սկսել թուրք-սիրիական սահմանին՝ Հալեպից հյուսիս տեղակայված Ջերաբլուսի շրջանում՝ նշելով այն «Իսլամական պետությունից» ազատագրելու նպատակների մասին: Եվ արդեն շուրջ մեկ ամիս է ինչ Թուրքիան գործողություններ է ծավալում Սիրիայի տարածքում:
Pingback: Թուրքիան պատրաստվում է պատ կառուցել Հայաստանի հետ սահմանին. Թուրքական ԶԼՄ | Ռազմ.info