Սեպտեմբերի 23-ին ՀՀ ՊՆ-ում քննարկվել է հոկտեմբերի 13-ից 15-ը Երևանում կայանալիք Սպառազինությունների և պաշտպանական տեխնոլոգիաների ArmHiTec-2016 առաջին միջազգային ցուցահանդեսի նախապատրաստական աշխատանքների ընթացքը: Այս մասին հայտնում է ՀՀ ՊՆ կայքը:
Հայաստանի ռազմարդյունաբերական արտադրանքի՝ «Բանակ-2016» ցուցահանդեսին ներկայացված նմուշներ (արխիվ)
Պաշտպանության նախարարի պաշտոնակատար Սեյրան Օհանյանի գլխավորությամբ անցկացված խորհրդակցությանը մասնակցել են ՀՀ ԶՈւ գլխավոր շտաբի պետ, գեներալ-գնդապետ Յուրի Խաչատուրովը, պաշտպանության նախարարի, ԶՈւ ԳՇ պետի տեղակալները, ՊՆ, ԶՈւ, ԶՈւ ԳՇ վարչությունների պետեր, բարձրաստիճան այլ զինվորականներ և քաղաքացիական հատուկ ծառայողներ:
Նշենք, որ ArmHiTec-2016 ցուցահանդեսը Երևանում կանցկացվի հոկտեմբերի 13-15-ին՝ ՀԱՊԿ գագաթաժողովի միջոցառումների շրջանակում:
Ցուցահանդեսի թեմատիկ ցանկն ընդգրկում է սպառազինությունների և ռազմականտեխնիկայի գործնականում կիրառվող ողջ տեսականին, առաջին պլան մղելով նորարարական տեխնոլոգիաների և բարձր ճշգրտության զենքի մշակումները։ Ցուցահանդեսն ընդգրկում է հետևյալ բաժինները.
- մարտի կառավարման համակարգեր,
- հաղորդակցման կապի միջոցներ և համակարգեր,
- զորքերի կառավարման ավտոմատ համակարգեր,
- ռոբոտատեխնիկական համակարգեր,
- անօդաչու ավիացիա,
- թռչող ապարատներ և համակարգեր,
- անօդաչու ավիացիայի հետ պայքարի տեխնոլոգիաներ,
- հայտնաբերման, որոնման և զննման միջոցներ,
- ճշգրիտ զենք,
- լազերային տեխնոլոգիաներ,
- օպտիկական-էլեկտրոնային սարքավորումներ եւ համակարգեր,
- ՀՕՊ միջոցներ,
- ռադիոհետախուզության, ռադիոէլեկտրոնային պայքարի և ռադիոհակազդման միջոցներ,
- «Ապագայի զինվորի» սպառազինություն, տեխնոլոգիաներ, հանդերձանք
- այլ թեմատիկ բաժիններ:
Ցուցահանդեսի նպատակն է ներկայացնել Հայաստանի և այլ երկրների նորագույն ռազմական տեխնիկան, ռազմարդյունաբերության նորարարական մշակումները: