Սիրիայում դադարեցվում է հրադադարի ռեժիմը

Սիրիայի ԶՈւ-ի հրամանատարությունը հայտնել է սեպտեմբերի 12-ին հայտարարված հրադադարի ռեժիմի ավարտի մասին։ Հայտարարության մեջ նշված է, որ ահաբեկիչները չեն հետևել հրադադարի ռեժիմի կետերին և խախտել են այն ավելին քան 300 անգամ։ Այս մասին հայտնում է Սիրիայի պետական SANA լրատվական գործակալությունը։

Սիրիայում և Իրաքում վերահսկողության գոտիները 2016թ. սեպտեմբերի 12-ի դրությամբ: Սիրիայի կառավարություն - կարմիր, Իրաքի կառավարություն - գազարագույն, «Իսլամական պետություն» - մուգ մոխրագույն, քրդեր - կանաչ, Սիրիայի հակակառավարական ուժեր - կապույտ:

Սիրիայում և Իրաքում վերահսկողության գոտիները 2016թ. սեպտեմբերի 12-ի դրությամբ: Սիրիայի կառավարություն ” կարմիր, Իրաքի կառավարություն ” գազարագույն, «Իսլամական պետություն» ” մուգ մոխրագույն, քրդեր ” կանաչ, Սիրիայի հակակառավարական ուժեր ” կապույտ:

Հիշեցնենք, որ ՌԴ արտգործնախարար Սերգեյ Լավրովի և ԱՄՆ պետքարտուղար Ջոն Քերիի` Ժնևի բանակցությունների արդյունքում ձեռքբերված համաձայնությամբ հրդադարի ռեժիմը ուժի մեջ էր մտել սեպտեմբերի 12-ին` արևի մայր մտնելուն պես։

7 օր հրադադարի ռեժիմ պահպանելուց հետո Ռուսաստանը և ԱՄՆ-ն նախատեսում էին ստեղծել համատեղ գործունեության կենտրոն, որը պետք է տարանջատեր չափավոր ընդդիմադիրներին  ահաբեկչական խմբավորումներից: Դրանից հետո ՌԴ և ԱՄՆ օդային ուժերը վերսկսելու էին ավիահարվածներ հասցնել ահաբեկչական խմբավորումներին: Մանրամասներն՝ այստեղ։

Նշենք նաև, չնայած  հրադադարի հաստատմանը` զինված խմբերը պարբերաբար խախտել են հրադադարի ռեժիմը, հրադադարի ռեժիմը խախտել է նաև ԱՄՆ գլխավորած կոալիցիոն ուժերը՝ հարվածելով Դեր Զորում սիրիական բանակի դիրքերին։

Սա այս տարվա ընթացքում Ռուսաստանի և ԱՄՆ-ի՝ Սիրիայում հրադադար հաստատելու երկրորդ փորձն էր: Առաջինը փետրվարին էր, երբ ՌԴ նախագահը ԱՄՆ նախագահի հետ համաձայնության էր հասել հրադադարի ռեժիմի հաստատման հարցում:

Հավելենք, որ Սիրիայում հրադադարի և երկրի հետագա ճակատագրի հետ կապված ռուս-ամերիկյան բանակցություններում հիմնական հակասությունը Սիրիայի ներկա նախագահ Բաշար Ասադի պաշտոնավարումն է: Ռուսաստանը պաշտպանում է Սիրիայի ներկայիս իշխանություններին, մինչդեռ ԱՄՆ-ն իր դաշնակիցների հետ պնդում է, որ Ասադը պիտի հեռանա իշխանությունից: