Սեպտեմբերի 20-22-ը ՌԴ Աստրախանի շրջանում և Կասպից ծովում անցկացվելու է «Կասպից-2016» միջազգային զորավարժությունը, որին մասնակցելու են Ռուսաստանի, Ադրբեջանի, Իրանի, Թուրքմենստանի և Ղազախստանի արտակարգ իրավիճակների գերատեսչությունները: Այս մասին հայտնում է ՌԴ արտակարգ իրավիճակների նախարարության պաշտոնական կայքը:
Իրանի կասպյան նավատորմի P225 «Ջոշան» (ձախից) և P224 «Փեյքան» (աջից, երկրորդ պլան) հրթիռային կատերները Ռուսաստանի Աստրախան նավահանգստում. լուսանկարը astra-novosti.ru կայքի
Սեպտեմբերի 20-ին՝ զորավարժությունների առաջին փուլում, մշակվելու են տեղեկատվության փոխանակման և զորքերի ու փրկարարական ծառայությունների միավորված խմբավորումների ստեղծման հարցեր:
Սեպտեմբերի 21-ին՝ երկրորդ փուլում, Կասպից ծովի ջրերում և «Լուկօյլ» ուսումնական կենտրոնում մշակվելու են տեխնածին և բնական աղետների հետևանքների վերացման համատեղ գործողություններ: Փրկարարները ցուցադրելու են իրենց որոնողափրկարարկան, բժկական հմտությունները:
Զորավարժությունների ընթացքում խաղարկվելու են նաև վթարված ռազմանավում հրդեհի մարման, բաց ծովում նավթի արտահոսքի տեղայնացման և վերացման դրվագներ:
Զորավարժությանը ներգրավված է ավելի քան 600 մարդ, 100 միավոր տեխնիկա և հատուկ սարքավորումներ:
Նշենք, որ 2014 սեպտեմբերին Ռուսաստանի Աստրախան քաղաքում Կասպից ծովի ավազանի 5 երկրների ղեկավարների չորրորդ գագաթաժողովումքննարկվել էին մի շարք հարցեր՝ ջրային տարածքների սահմանազատումից մինչև ռազմածովային համագործակցություն։ Հենց այդտեղ էլ ՌԴ նախագահ Վլադիմիր Պուտինն Իրանին, Ղազախստանին, Թուրքմենստանին և Ադրբեջանին առաջարկել էր 2016 թվականին համատեղ զորավարժություններ անցկացնել։
Դրանից հետո 5 պետությունների նավատորմերը համատեղ երկկողմ և եռակողմ մի շարք զորավարժություններ են անցկացրել և ռազմանավերով բարեկամական փոխայցեր են կատարել մեկը մյուսի նավահանգիստներ: Սակայն սա կլինի բոլոր 5 պետությունների առաջին համատեղ զորավարժությունը:
Pingback: Մերձկասպյան երկրները 2017-ին զորավարժություն են անելու Ադրբեջանի տարածքում | Ռազմ.info