Սեպտեմբերի 14-ին ԱՄՆ Պետդեպարտամենտի ներկայացուցիչ Մարկ Թոները հերթական բրիֆինգի ժամանակ հայտարարել է, որ ԱՄՆ պետքարտուղար Ջոն Քերին և Ռուասատանի արտգործնախարար Սերգեյ Լավրովը համաձայնության են եկել ևս 48 ժամով երկարացնել ԱՄՆ և Ռուսաստանի համաձայնությամբ կնքված հրադադարը Սիրիայում:
Այս մասին տեղեկացնում է ԱՄՆ պետդեպարտամենտի մամուլի ծառայությունը:
Ավելի վաղ նույն օրը ՌԴ զինված ուժերի գլխավոր օպերատիվ վարչության հրամանատարի տեղակալ, գեներալ-լեյտենանտ Վիկտոր Պոզնիխիրը հայտարարել էր, որ Ռուսաստանը կողմ է Սիրիայում հրադադարի ռեժիմը ևս 48 ժամով երկարաձգելուն: Նաև նշել էր, որ իրենց կողմը, համաձայն Ժնևում ձեռք բերված ռուս-ամերիկյան պայմանավորվածությունների, լիովին կատարում է իր պարտավորությունները:
Հիշեցնենք, որ Սիրիայում հրադադար հաստատելու մասին համաձայնությունը Ռուսաստանը և ԱՄՆ-ն ձեռք են բերել սեպտեմբերի 10-ին: 7 օր հրադադարի ռեժիմ պահպանելուց հետո Ռուսաստանը և ԱՄՆ-ն ստեղծելու են համատեղ գործունեության կենտրոն, որը պետք է տարանջատի չափավոր ընդդիմադիրներին ահաբեկչական խմբավորումներից: Դրանից հետո ՌԴ և ԱՄՆ օդային ուժերը սկսելու են ավիահարվածներ հասցնել ահաբեկչական խմբավորումներին:
Նշենք նաև, չնայած հրադադարի հաստատմանը` զինված խմբերը որոշ վայրերում խախտել են այն: Երեկ՝ սեպտեմբերի 13-ին միայն Հոմս նահանգի հյուսիսում հրադադարը խախտվել է 7 անգամ: