Մայրամուտին Սիրիայում կհաստատվի հրադադարի ռեժիմ

Այսօր` սեպտեմբերի 12-ին`  արևի մայր մտնելուն պես Սիրիայում պետք է հաստատվի  հրադադրի ռեժիմ, որը նախատեսվում  է սեպտեմբերի 10-ին  ՌԴ արտգործնախարար Սերգեյ Լավրովի և ԱՄՆ պետքարտուղար Ջոն Քերիի` Ժնևի բանակցությունների արդյունքում ձեռքբերված համաձայնությամբ:

Բանակցությունների արդյունքում համաձայնեցվել է 5 փաստաթուղթ, և Սիրիայի իշխանությունները հաստատել են  կրակի դադարեցման վերաբերյալ այս  համաձայնությունը:

Իրավիճակը Սիրիայի հյուսիսային շրջաններում՝ 2016 թ. սեպտեմբերի 7-ի դրությամբ

Ըստ համաձայնագրի՝ նախևառաջ նախատեսվում է Սիրիայում հաստատել հրադադարի ռեժիմ. սկզբում 48 ժամ: Այդ 48 ժամում հրադադարը պահելուց հետո կսահմանվի հրադադարի ևս 48 ժամ:

7 օր հրադադարի ռեժիմ պահպանելուց հետո ստեղծվելու է համատեղ գործունեության կենտրոն, որը պետք է տարանջանտի  «չափավոր» ընդդիմադիրներին «Ան-Նուսրայի ճակատ» և «Իսլամական պետություն» ահաբեկչական խմբավորումներից, ինչից հետո արդեն ՌԴ օդատիեզերական և ԱՄՆ ռազմաօդային ուժերը հարվածներ են հասցնելու ահաբեկիչներին:

Համաձայնությամբ հստակցվել են նաև այն շրջանները, որտեղ պետք է հարվածներ հասցնեն միայն ՌԴ և միայն ԱՄՆ ուժերը: Սիրիական ուժերը գործելու են ՌԴ-ին և ԱՄՆ-ին հատկացված սահմաններից դուրս:

Համաձայնագրով նախատեսվում է նաև հումանիտար օգնություն տրամադրել բնակչությանը: