Սեպտեմբերի 6-ին Իրանի Արևմտյան Ադրբեջան նահանգի Քանի Սիու գյուղի մոտ Իրանի ԶՈւ ռազմական հետախուզության ուժերի «Իմամ Զաման» ստորաբաժանման հետ բախման արդյունքում վնասազերծվել է «Իրանական Քուրդիստանի Դեմոկրատական կուսակցության» 8 քուրդ գրոհային: Այս մասին իրանական «Թասնիմ» լրատվական գործակալությանը հայտնել է Արևմտյան Ադրբեջան նահանգի նահանգապետ Ազիզ Հասանին:
Իրանի ԶՈւ «Իմամ Զաման» ռազմական հետախուզության զինվորներ
Ըստ Հասանիի` անվտանգության ուժերից զոհեր չկան:
2016թ հունիս ամսից Իրանի Իսլամական հեղափոխության պահապանների կորպուսը (ԻՀՊԿ) երկրի հյուսիս-արևմուտքում և հարավ-արևելքում ահաբեկչական խմբավորումների դեմ ակտիվ պայքար է մղում:
Հունիս-հուլիս ամիսներին իրականացրած հակաահաբեկչական գործությունների արդյունքում ձերբակալվել և ոչնչացվել են մի քանի տասնյակ ահաբեկիչներ:
Իսկ օգոստոսի 3-ին Իրանի ոստիկանության և անվտանգության ուժերը վնասազերծել էին «Թաուհիդ և Ջիհադ» ահաբեկչական խմբավորման 102 զինյալների: Արևմտյան և հյուսիս-արևմտյան Իրանում խմբի ծավալած գործողություններից տուժել էր 60 իրանցի (20 զոհ, 40 վիրավոր), այդ թվում նաև Քրդստանի սունիներ:
Իրանի հյուսիս-արևմուտքում ընդհանուր առմամբ գործում է 5 ծայրահեղական խմբավորում: