Այսօր՝ օգոստոսի 18-ին, Հայաստանի կառավարությունն իր որոշումներից մեկով հայաստանյան «Ասպար արմս» ընկերությանը «Զենքի / քաղաքացիական զենքի և դրանց փամփուշտների արտադրություն, զենքի գեղարվեստական հարդարում և նորոգում / արտադրության» արտոնագիր է տվել՝ երեք տարով: Այս մասին հայտնում է ՀՀ կառավարության կայքը:
Հայաստանյան ընկերությունը մինչ այս ուներ զենքի արտադրության արտոնագիր և զբաղվում էր հրազենի մշակումներով ու արտադրությամբ: Ընկերության արտադրանքը մատակարարվել է նաև ՀՀ պաշտպանության նախարարությանը (մանրամասն ստորև):
Արտոնագրերի տարբերությունը հասկանալու համար կարելի է կողք կողքի համեմատել դրանց անվանումները.
2007 (գործում է մինչև 2020) | 2016 |
«Զենքի արտադրության» արտոնագիր | «Զենքի / քաղաքացիական զենքի և դրանց փամփուշտների արտադրություն, զենքի գեղարվեստական հարդարում և նորոգում / արտադրության» արտոնագիր |
Ինչ վերաբերում է զենքի արտադրության արտոնագրին (լիցենզիա), ապա «Ասպար արմս» ընկերությունն այն ստացել է դեռևս 2007-ին՝ 3 տարով: ՀՀ կառավարությունն այդ արտոնագրի գործողության ժամկետը հինգական տարով երկարացրել է 2010 և 2015 թվականներին (արտոնագրի ժամկետը փաստացի մինչև 2020 թվականն է):
Հենց ՀՀ կառավարության 2015թ. որոշման հիմնավորումից հայտնի է դարձել հետևյալը. «…ընկերությունը 2012 թվականից առ այսօր (2015 հոկտեմբեր – Razm.info) կատարել է մարտական զենքի արտադրության 83500.0 հազ. դրամի պայմանագրային աշխատանքներ»:
Ինչ վերաբերում է ընկերության արտադրանքին, ապա «Ասպար արմսը», ըստ պաշտոնական կայքի, արտադրում-արդիականացնում է դիպուկահար հրացաններ: 2016թ. հունիսին ընկերությունը նշել է գործունեության տասը տարին: