Օգոստոսի 10-ին ՀՀ ՊՆ վարչական համալիրում պաշտպանության նախարարը, ԶՈւ հրամկազմը հյուրընկալել են ապրիլյան մարտական գործողություններին մասնակցած կամավորական ջոկատների հրամանատարներին և մի շարք մարտիկների:
Այս մասին հայտնում է ՀՀ ՊՆ մամուլի ծառայությունը։
ՀՀ ՊՆ վարչական համալիրում ընդունել են ապրիլյան գործողություններին մասնակցած կամավորականներին
ՀՀ պաշտպանության նախարար Սեյրան Օհանյանն իր խոսքում մասնավորապես շեշտել է, որ կարողացել ենք ստեղծել մարտունակ բանակ, անվտանգային համակարգ։ Ապրիլի սկզբին Արցախի դեմ սանձազերծված գործողությունների չեզոքացումն էլ վկայությունն է նրա, որ պաշտպանության բանակն իր առջև դրված խնդիրները կատարում է:
«Բայց երբ բանակը համալրվում է նաև մարտական ընկերներով, կամավորականներով, այն ավելի ամուր, ավելի հզոր է դառնում և ավելի մեծ հենք է ստեղծում ապագա անվտանգային համակարգը ձևավորելու համար»,- ասել է Սեյրան Օհանյանը:
Մարտական գործողություններին մասնակցած կամավորականներն էլ իրենց խոսքում նշել են, որ դիրքերում փաստել են, որ իրենցից ավելի հզոր և մարտական առավել բարձր ոգի ունեցողներ էլ կան. նրանք այսօր դիրքերում կանգնած պաշտպանության բանակի զինվորներն են: Կամավորականները շեշտել են, որ այդ փաստն իրենց ոչ թե մտահոգել կամ հիասաթափեցրել է, այլ, ընդհակառակը, ոգևորել է, որ այսօրվա սերունդն ավելի ամուր է կառչած իր հողին և պատրաստ է կյանքի գնով էլ պաշտպանել հայրենիքը:
Հանդիպման ավարտին Սեյրան Օհանյանը Արցախի անվտանգության ապահովման գործում ներդրած ավանդի համար մի քանի տասնյակ կամավորականների հանձնել է գերատեսչական մեդալներ:
ՀՀ ՊՆ վարչական համալիրում ընդունել են ապրիլյան գործողություններին մասնակցած կամավորականներին