ՀՀ-ում ընթացող հրամանատարաշտաբային զորավարժությունները կնպաստեն ՀՀ ԶՈՒ մարտունակության բարձրացմանը

Պաշտպանության նախարարությունից տեղեկացնում են, որ հոկտեմբերի 1-ից ՀՀ տարածքում սկսված հրամանատարաշտաբային զորավարժություններին ամբողջ կազմով ընդգրկված են ՀՀ ԶՈՒ, ոստիկանության զորքերի և ԱԱԾ սահմանապահ զորքերի ստորաբաժանումները:
Զորավարժությունների ընթացքում իրականացվել են գործողություններ նոր կազմավորվող և վերակազմավորվող զորամասերի ներգրավմամբ, գործնականորեն ստուգվել է ոստիկանության զորքերի մարտունակությունը, ինչպես նաև ԱԱԾ սահմանապահ զորքերի զորահամալրումը և միջոցառումների անկացումը, փորձակվել են անօդաչու թռչող սարքերը, հակատանկային ստորաբաժանումները գործնականում առաջին անգամ կիրառել են հակառակորդի ակտիվ պաշտպանություն ունեցող զրահատեխնիկան խոցելու համար նախատեսված նոր հակատանկային միջոցները, մեկ անգամ ևս հստակեցվել են հրթիռային զորքերի խմբավորման և կիրառման հարցերը:
Այս օրերին իրականացվել են կենտրոնական ենթակայության զորամասերի հետ կապված մի շարք միջոցառումներ, մասնավորապես` արագ զորաշարժերի իրականացումը, բարդ, փոփոխվող իրավիճակում ծագող առանձին խնդիրների լուծումը: Առաջին անգամ հակաօդային պաշտպանության զորքերն ամբողջ ծավալով իրականացրել են բարդ մարտավարական հնարքներ` հաշվի առնելով հավանական հակառակորդի ավիացիայի քանակական աճը:
Ռազմավարական հրամանատարաշտաբային զորավարժությունների ընթացքում բարձրացվում է բոլոր կարգի շտաբների պատրաստության որակը, զինված ուժերն ստանում են գործնական փորձ, դաշտային վարժվածություն, ինչպես նաև իրականացվում են մի շարք միջոցառումներ, որոնք ՀՀ զինված ուժերին հնարավորություններ են ընձեռնում հավուր պատշաճի կատարելու իրենց առջև դրված խնդիրները:
Վերջին տարիներին անցկացված օպերատիվ մարտավարական, ռազմավարական հրամանատարաշտաբային զորավարժությունները վկայում են, որ ՀՀ զինված ուժերը բարձրացնում են մարտունակությունը: