Սիրիայի օդուժը կասեցրել է Հալեպում զինյալների առաջխաղացումը

Օգոստոսի 4-ին, նախքան Հալեպի հարավում ահաբեկչական խմբավորումների գրոհի սկսվելը, Սիրայի կառավարական օդուժը դաշնակից ուժերի հետ համատեղ ավիահարվածներ են հասցրել խմբավորումների դիրքերին, զոհվել է 15 ահաբեկիչ, կան տասնյակ վիրավորներ:

Այս մասին հայտնում է ռուսաստանյան Ռիա Նովոստի գործակալությունը` փոխանցելով «Ալ-Մայադին» հեռուստաալիքից ստացած տեղեկությունը:

Այսօր՝ օգոստոսի 5-ին, արաբական «ալ-Ջազիրա» հեռուստաալիքի կայքը հայտնել է, որ Սիրիայի կառավարական ուժերը Հալեպի հարավ-արևմուտքում զինյալներից մի քանի բլուր և որոշակի կարևոր դիրքեր են կարողացել ազատագրել:

Սիրիայի կառավարական ուժերը Հալեպի հյուսիսային շրջաններում. (արխիվ)

Սիրիայի կառավարական ուժերը Հալեպի հյուսիսային շրջաններում. (արխիվ)

Օդային հարվածները հասցվել են Խան-Թումանի բնակավայրում կուտակված ահաբեկիչների դիրքերին: Ավելի վաղ Հալեպի աշխարհազորայինները հայտնել են, որ ահաբեկիչները ենթարկվել են զանգվածային գնդակոծության Համադան թաղամասում (Խան-Թումանից 12 կմ հեռու): Զոհվել է 3 քաղաքացի, վիրավորվել` 20-ը:

Հալեպի հարավային թաղամասերում շրջափակված են ահաբեկիչների զգալի ուժեր: 15 զինված խմբավորումների միավորումը (ավելի քան հինգ հազար մարտիկ) վերջին հինգ օրերին փորձում ճեղքել Հալեպի հարավում կառավարական ուժերի շրջափակումը:

Վերջին օրերին  սիրիական բանակը` ավիացիայի և հրետանու օգնությամբ, Հալեպի հարավում կարողացել է հետ մղել ահաբեկիչների երկու խոշոր հարձակումներ, որի արդյունքում սպանվել է ավելի քան 800 ահաբեկիչ:

Հավելենք, որ օգոստոսի 2-ին սիրիական օդային ուժերը և ռուսաստանյան ավիատեզերային ուժերը համատեղ հարվածներ են հասցրել ահաբեկչական խմբավորումների դիրքերին, երբ «Ջեյշ ալ-Ֆաթհ» Իսլամական կոալիցիան փորձել է կոտրել արևելյան Հալեպի շրջափակումը:

Հալեպը գրավելու և «իսլամական ճշմարիտ օրենքներով» կառավարելու ծրագրեր մասնավորապես ունեին «Ալ Կաիդայի» սիրիական մասնաճյուղ «Նուսրայի ճակատ» և «Ահրար ալ Շամի» խմբավորումները:

Ավելացնենք, որ 2012 թ. օգոստոսից Հալեպը բաժանված է երկու մասի` արևմտյան շրջանը պաշտպանում է սիրիական բանակը, իսկ արևելյան շրջանը գտնվում է երկու տասնյակ զինված խմբավորումների վերահսկողության տակ:

Հոդվածի հեղինակ՝ Զեմֆիրա Եգանյան

2 responses to “Սիրիայի օդուժը կասեցրել է Հալեպում զինյալների առաջխաղացումը

  1. Pingback: Զինյալները փորձել են ճեղքել Հալեպի շրջափակումը | Ռազմ.info

  2. Pingback: Հալեպում շարունակվում են զինյալների և կառավարական ուժերի բախումները. ՌԴ ՊՆ | Ռազմ.info

Մեկնաբանել

Ձեր էլ. փոստի հասցեն չի հրատարակվելու: Պարտադիր դաշտերը նշված են *