Սիրիական զորքերը պահպանել են վերահսկողությունը Դեր Զորում

Օգոստոսի 2-ին Սիրիայի կառավարական ուժերը կարողացել են հետ մղել երկրի կենտրոնարևելյան շրջանում ռազմավարական կարևոր դիրք զբաղեցնող Դեյր Էզ-Զոր քաղաքի վրա «Իսլամական պետություն» ահաբեկչական խմբավորման հարձակումը:

Այս մասին հայտնում է ռուսաստանյան «ՏԱՍՍ» լրատվական գործակալությունը փոխանցելով սիրիական պետական «ՍԱՆԱ» գործակալությունից ստացած տեղեկությունը:

Սիրիայի տարածքների վերահսկողությունը 2016թ. մարտի 23 դրությամբ

Հաղորդվող տեղեկության համաձայն` ԻՊ գրոհայինները փորձում էին գրավել Դեյր Էզ-Զորի շրջանում կարևոր դիրք զբաղեցնող «Ֆուրատ աշ-Շամ» հյուրանոցը, ինչպես նաև մեկ էլեկտրակայան և մեկ ջրամղիչ կայան:

Ահաբեկչական խմբավորման հարձակումը հետ մղելուց հետո Սիրիայի կառավարական ուժերը հակահարձակման անցնելով ` հարվածներ են հասցրել Դեյր Զորի Թել Ռավադ շրջանում ԻՊ դիրքերին: Ներկայումս այդ շրջանում մարտերը շարունակվում են:

Նշենք, որ Դեյր Էզ-Զորի հարակից շրջանները ամբողջությամբ գտնվում են ԻՊ վերահսկողության ներքո: Սիրիայի կառավարական ուժերի վերահսկողության ներքո գտնվող տարածքները երկրի արևելյան, հարավ-արևելյան շրջաններում են և կտրված են Դեյր Էզ-Զորից: Այս տեսանկյունից նշված շրջանում վերահսկողությունը պահպանելը կարևոր ռազմավարական նշանակություն ունի Սիրիայի կառավարարական ուժերի համար:

Հիշեցնենք, որ 2014 թ. սեպտեմբերին «Իսլամական պետություն» խմբավորումը պայթեցրել էր Սիրիայի Դեյր Էզ-Զոր շրջանի Սրբոց Նահատակաց հայկական եկեղեցին, որտեղ ամփոփված էին Հայոց ցեղասպանության զոհերի մասունքները։

2015 թ. ԻՊ-ն պաշարել էր Դեյր Զոր քաղաքը, սակայն այնտեղ գտնվող կառավարամետ ուժերը մինչ օրս կարողանում են վերահսկողությունը փոփոխական հաջողություններով պահպանել: Քաղաքի տարածքում կա օդանավակայան, ինչպես նաև շրջանը հարուստ է նավթահորերով, ըստ այդմ մեծ կարևորություն է ներկայացնում երկու կողմերի համար:

Սիրիայի կառավարական ուժերին 2016 թ. հունվարից ավիահարվածներով օգնում են նաև ՌԴ ավիատիեզերական ուժերի կործանիչները, ինչպես նաև լիբանանյան «Հզբալլահ» շարժման մարտիկները:

Հոդվածի հեղինակ՝ Զեմֆիրա եգանյան

Սիրիայի Դեյր Զոր քաղաքը 2016 թ. մարտի դրությամբ