«Իսլամական պետությունը» ծրագրում է հարվածել Իրանին. Իրանի ԶՈւ

Իրանի ԶՈւ ցամաքային զորքերի հրամանատար, բրիգադի գեներալ Ահմադ Ռեզա Փուրդաստանը հայտարարել է, որ «Իսլամական պետություն» ահաբեկչական խմբավորումն ավելի է մոտեցել Իրանի սահմաններին և ծրագրում է հարվածներ հասցնել վերջինիս:

Մասնավորապես նա նշում է, որ   ԻՊ-ի ստորաբաժանումներ կան Իրաքի՝ Իրանին սահմանակից Դիյալա նահանգում: Բացի այդ, «Իսլամական պետությունը» Աֆղանստանում է՝  Պակիստանի հետ սահմանին մոտ, և ծրագրում է հարվածել Իրանին:

Այս մասին հայտնում է իրանական «Ֆարս Նյուզ» լրատվական գործակալությունը:

Իրանի ցամաքային զորքերի հրամանատար, բրիգադի գեներալ Ահմադ Ռեզա Փուրդաստանը

Նա ասում է, որ Հարավային Իրանում ԻՊ-ն արդեն հասցրել է իր շարքերը զորագրել մի խումբ մարդկանց: Նրա խոսքով երկրի ուժայինները վերջերս երկրի արևմտյան շրջաններում սպանել էին ահաբեկչական խմբավորման կողմից վարժեցված և մահապարտի բաճկոններով սպառազինված 2 ահաբեկիչների:

Փուրդաստանը, առավել վաղ, 2016-ի մայիսին հայտարարել էր, որ երկրի սահմանին սպանվել է ԻՊ 2 ահաբեկիչ, ովքեր պատրաստվում էին մահապարտական ահաբեկչություն իրականացնել փետրվարին:

Հիշեցնենք, որ հուլիսի վերջերին Իրանի հյուսիս-արևմուտքում՝ Քուրդիստան և Արևմտյան Ատրպատական (Ադրբեջան) նահանգներում 2 ահաբեկչական խմբավորում էր ոչնչացվել:  Ընդհանուր թվով 23 ահաբեկիչ էր սպանվել, ինչպես նաև վնասներ էր հասցվել նրանց բազաներին:

«Իսլամական պետություն» ահաբեկչական խմբավորման զինյալներ

Ավելի վաղ՝ հուլիսի 19-ին Իրանի հարավարևելյան  Սիստան-Բելուջիստան նահանգ ում ձերբակալվել էր 40 ահաբեկիչ: Այդ նահանգի Խաշ քաղաքում հայտնաբերվել էր ահաբեկիչների կառուցած ստորգետնյա թունելը, որի միջոցով նրանք պլանավորել էին իրականացնել 2 խոշոր պայթյուն:

Իրանի հյուսիս-արևմուտքում ընդհանուր առմամբ գործում է 5 ահաբեկչական խմբավորում, իսկ 2016թ. հունիսից Իրանը  Քուրդիստան և Սիստան-Բելուջիստան նահանգներում ակտիվ պայքար է մղում ահաբեկչական խմբավորումների դեմ:

«Իսլամական պետություն» ահաբեկչական խմբավորման վերահսկած տարածքի կորուստները 2015 հունվար — 2016 հուլիս ժամանակահատվածում