Սեյրան Օհանյանն ընդունել է Չեխիայի ժամանակավոր հավատարմատար Պետր Միկիսկային

Հոկտեմբերի 5-ին հանդիպման ընթացքում կողմերը կարևորել են պաշտպանական ոլորտում երկու երկրների համագործակցությունն ու քննարկել տարածաշրջանային անվտանգության հարցեր:
Անդրադառնալով սեպտեմբերին անցկացված «Փոխգործակցություն-2012» և այս օրերին անցկացվող ռազմավարական հրամանատարաշտաբային զորավարժություններին՝ պաշտպանության նախարարն ասել է, որ «Փոխգործակցություն-2012» զորավարժության ընթացքում մասնակից երկրների զորատեսակաները և այլ օժանդակող ստորաբաժանումները իրականացրել են իրենց առջև դրված խնդիրները՝ ցուցաբերելով ներդաշնակ գործելու բարձր մակարդակ:
Իսկ ներկայումս ՀՀ տարածքում անցկացվող ռազմավարական հրամանատարաշտաբային զորավարժության նպատակն է ստուգել հակառակորդի ագրեսիային դիմագրավման հարցում ՀՀ ԶՈՒ, պետական և տեղական ինքնակառավարման մարմինների փոխգործակցության մակարդակը:
Սեյրան Օհանյանը նաև ընդգծել է, որ Հայաստանում իրականացվող զորավարժությունները միշտ անցկացվել են բաց և թափանցիկ մթնոլորտում. զորավարժությունների խնդիրների և նպատակների վերաբերյալ պարբերաբար տեղեկացվում է ինչպես հասարակությունը, այնպես էլ գործընկերներ երկրները: