Հուլիսի 15-ին ՀՀ ՊՆ վարչական համալիրում մեկնարկել է բանակային զորամիավորումների, ՊՆ, ԶՈւ և ԶՈւ ԳՇ, Արցախի ՊԲ ստորաբաժանումների կողմից 2016 թ. առաջին կիսամյակի ընթացում իրականացված աշխատանքների կատարողականին նվիրված երկօրյա խորհրդակցությունը: Այս մասին հայտնում է ՀՀ ՊՆ մամուլի ծառայությունը:
2016-ի առաջին կիսամյակաի աշխատանքների կատարողականին նվիրված խորհրդակցություն ՀՀ ՊՆ-ում
Խորհրդակցության ընթացքում բանակային կորպուսների հրամանատարները ներկայացրել են հաշվետու ժամանակահատվածում կատարած աշխատանքների վերլուծությունը: Շեշտվել է, որ հաշվետու ժամանակահատվածում անցկացվել են ԶՈւ պատրաստության պլանով նախատեսված բոլոր միջոցառումները, ճամբարային հավաքներն ու դաշտային ելքերը, իրականացվել են ենթակա ստորաբաժանումների մարտական պատրաստականության բարձրացմանը միտված մի շարք արտապլանային միջոցառումներ:
Խորհրդակցության մասնակիցները հանդես են եկել նաև առաջարկներով, որոնք առավելապես վերաբերում էին ապրիլյան մարտական գործողությունների վերլուծության արդյունքում առանձին պլանների ճշգրտմանը, ինժեներական և ամրաշինական կառույցների բարելավմանը և այս ուղղությամբ պատասխանատու ստորաբաժանումների կողմից իրականացվող ընթացիկ ու հեռանկարային ծրագրերին:
Առանձնակի ուշադրություն է դարձվել հանկարծակի ստուգումներին, որոնց ընթացքում վերհանվել է մարտական պատրաստականության և մարտական կիրառման պլանների իրատեսությունը, մարտական պատրաստության մի շարք առարկաներից անցկացվել են ստուգողական գործնական պարապմունքներ, անձնակազմի, սպառազինության և տեխնիկայի, նյութական միջոցների առկայության և վիճակի ստուգումներ: Այս ամենից զատ` զորամիավորումներում անցկացվել են առաջավոր փորձի ուսումնասիրման, փոխանակման և ներդրման բազմաթիվ միջոցառումներ:
2016-ի առաջին կիսամյակաի աշխատանքների կատարողականին նվիրված խորհրդակցություն ՀՀ ՊՆ-ում
Ամփոփելով զեկույցները` բանակային կորպուսների հրամանատարներն անդրադարձել են ՀՀ պաշտպանության նախարարի և ԶՈւ ԳՇ պետի հանձնարարականների ուղղությամբ իրականացված աշխատանքներին, բարձրաձայնել են խնդրահարույց հարցեը, ներկայացրել խնդիրների կարգավորմանն ու շտկմանը միտված կոնկրետ առաջարկներ:
Խորհրդակցության շրջանակում հաշվետու զեկույցներով հանդես են եկել նաև ՊՆ, ԶՈւ և ԶՈւ ԳՇ մի շարք ստորաբաժանումների ղեկավարներ: Նշվում է, որ վարչություններն ու ենթակա ստորաբաժանումները կատարել են 2016-ի առաջին կիսամյակի պլանով նախատեսված բոլոր միջոցառումները, զինված ուժերի ստորաբաժանումները համալրվել են անհրաժեշտ սպառազինությամբ և ռազմական արդի տեխնիկայով: Ձեռնարկված քայլերի արդյունքում զգալիորեն բարձրացել է ստորաբաժանումների մարտունակությունն ու անձնակազմի պաշտպանվածությունը:
Ամփոփելով խորհրդակցության ընթացքում ներկայացված զեկույցները, ՀՀ պաշտպանության նախարար Սեյրան Օհանյանը վերհանել է շտկման կարիք ունեցող խնդիրները, ներկաների ուշադրությունն է հրավիրել «Պատրաստված հրամանատար, արհեստավարժ բանակ, ապահով հայրենիք» կարգախոսով ընթացող ուսումնական տարվա առավելագույն ուշադրություն պահանջող հետագա աշխատանքային ուղղությունների վրա։