Իրանը շարունակելու է զարգացնել իր հրթիռային ծրագիրը

Հուլիսի 9-ին Իրանի ԱԳՆ խոսնակ Բահրամ Ղասեմին, անդրադառնալով Անգելա Մերկելի այն հայտարարությանը, ըստ որի Իրանի հրթիռային ծրագիրը չի համապասխանում ՄԱԿ-ի բանաձևին, հայտարարել է , որ   այն բացառապես պաշտպանական դոկտրինայի շրջանակներում է և չի հակասում  ՄԱԿ ԱԽ 2231 բանաձևին: Փոխանցում է Իրանի ԱԳՆ պաշտոնական կայքը:

Բալիստիկ հրթիռի փորձարկում Իրանում, մարտ 2016թ.

«Հրթիռները միջուկային մարտագլխիկներ չեն կրելու, և նման հայտարարությունները որևէ կերպ չեն խանգարելու  Իրանին  զարգացնելու իր հրթիռային ծրագիրը», — հայտարարել է Իրանի ԱԳՆ խոսնակը:

Նշենք , որ Իրանի զինված ուժերը ընթացիկ տարում արդեն բալիստիկ հրթիռների մի քանի փորձարկումներ են իրականացրել, մասնավորապես մարտին և մայիսին:

ՄԱԿ ԱԽ 2231 բանաձևը, որի մասին խոսել են կողմերը, ընդունվել է Իրանի և «վեցնյակի» միջև միջուկային ծրագրի շուրջ համաձայնության ձեռքբերումից հետո: Համաձայն բանաձևի  Իրանը պարտավոր է  հրաժարվել միջուկային զենք ստեղծելու ծրագրից:

Հոդվածի հեղինակ Ժաննա Վարդանյան